«Այս պահին ինչ-որ պաշտոնի մասին չեմ մտածում»․ Մամիկոն Ասլանյան

«Այս պահին ինչ-որ պաշտոնի, աթոռի մասին չեմ մտածում»,-դատական հերթական նիստից հետո, լրագրողների հետ զրույցում, ասաց Վանաձորի նախկին քաղաքապետ Մամիկոն Ասլանյանը։ «Ես մտածում եմ որպես տասնամյակների ստաժ ունեցող իրավաբան, որ մեր երկրում պետք է կայանան այն ինստիտուտները, որոնք մարդկային ճակատագրեր են որոշում։ Ասենք՝ ես էի, որոշակի դիմակայունություն ունեի, բայց մարդիկ կան, որ կարող են հայտնվել նման հորձանուտում և կորցնել իրենց։ Հետևաբար կարծում եմ, որ դատական իշխանությունը և իշխանության տարբեր թևերը պետք է կարողանան գործել Սահմանադրությանը և օրենքներին համապատասխան։ Մեր երկրում ի վերջո պետք է դատական անկախ իշխանություն կայանա»,- ասաց նա:
Լրագրողի դիտարկմանը, թե ենթադրություններ կան, որ հնարավոր է կրկին փոխվի նրա խափանման միջոցը, Ասլանյանը պատասխանեց․ «Ոչ ոք այս երկրում չի կարող ոչինչ բացառել։ Կարծում եմ՝ այն իրավաբանները, որոնք մարդկանց ճակատագրերը որոշելու լիազորություններով են օժտված, պետք է զերծ լինեն կանխակալ վերաբերմունքից, ճնշումներից, մթնոլորտում տիրող տրամադրություններից, և որոշումներ կայացնելիս առաջնորդվեն զուտ օրենքով»։