Սիցիլիայի ջրերից դուրս է բերվել զբոսանավի վերջին ուղևորի մարմինը

Ջրասուզակները Սիցիլիայի ափերի մոտ օրերս խորտակված զբոսանավից դուրս են բերել Հաննա Լինչի մարմինը՝ ավարտելով որոնողական աշխատանքները։

BBC-ն գրում է, որ 18-ամյա Հաննա Լինչի մարմնի հայտնաբերումից հետո մարդիկ սկսել են ցավակցություններ հղել նրա և նրա հոր՝ ձեռնարկատեր Մայք Լինչի մահվան կապակցությամբ. հոր մարմինը հայտնաբերվել էր օգոստոսի 22-ին։

Անհետ կորած 6 անձանց որոնումները շարունակվում էին օգոստոսի 19-ից։ Ընդհանուր առմամբ, նավաբեկության հետևանքով զոհվել է 7 մարդ. նրանցից մեկի՝ նավի շեֆ-խոհարարի մարմինը գտել էին աղետից մի քանի ժամ անց։ Բրիտանական դրոշի ներքո նավարկող 56 մետր երկարությամբ Bayesian առագաստանավը, որտեղ եղել է 22 մարդ (12 հյուր և անձնակազմի 10 անդամ), օգոստոսի 19-ի առավոտյան ջրասույզ է եղել է Պալերմո քաղաքից ոչ հեռու։
Նավը խորտակվել է մի քանի րոպեի ընթացքում, փոթորկի պատճառով: 59-ամյա Լինչը Միացյալ Թագավորության տեխնոլոգիական ոլորտի ամենահայտնի ձեռներեցներից մեկն էր և ընկերներին հրավիրել էր միանալ իրեն զբոսանավում՝ նշելու իր արդարացումը ԱՄՆ-ում խարդախության գործով խոշոր դատավարության ժամանակ:

Զոհերի թվում են նաև աշխարհի խոշորագույն ներդրումային բանկերից մեկի՝ Morgan Stanley International-ի տնօրենների խորհրդի նախագահ Ջոնաթան Բլումերը և նրա կին Ջուդին, Clifford Chance ընկերության փաստաբան Քրիս Մորվիլոն և նրա կին Նեդան։15 մարդ, այդ թվում՝ 1 տարեկան մի երեխա և Լինչի կինը, կարողացել են փրկվել։