Սև ու սպիտակ բացառիկ ցուցադրություն` Սյունիքի գունավոր անցյալի մասին

Հայաստանի նկարիչների միությունում այսօր տեղի ունեցավ «Գուրոս․ Սյունիքը վավերագրողը» ցուցահանդեսի բացումը։
Ներկայացվել են «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի ֆոնդերում պահվող արվեստագետ Գուրոսի՝ Գուրգեն Պարոնյանի սևանկարների հավաքածուից ավելի քան 180 լուսանկար։
Դրանց մի մասը երբևէ չհրապարակված բացառիկ պատկերներ են, որոնք կարևոր տեղեկություններ են պարունակում Սյունիքի բնության ու հուշարձանների, բնակավայրերի ու բնակչության մասին:
Բացառիկ գիտաճանաչողական արժեք ներկայացնող հավաքածուում ընդգրկված պատկերները հնարավորություն են տալիս տեսնել Գորիսի՝ տարածաշրջանի քարանձավային բնակավայրից դեպի կանոնավոր փողոցներով, քարաշեն, երկհարկանի առանձնատներով բնակավայրի աստիճանական զարգացումը:

Գուրգեն Պարոնյանը (Գուրոս) սերում է Գորիսի հայտնի ազնվական՝ Մելիք-Օհանյանների տոհմից։ Չնայած նա իր ստեղծագործական կյանքի մեծ մասը նվիրել է գեղանկարչությանը՝ ինքնուրույն վարժվելով այդ բնագավառում, Գուրոսն արվեստի ասպարեզ է մուտք գործել՝ որպես լուսանկարիչ, 22 տարեկան հասակում։ (Կենտրոնանալով ազգագրական, պատմագրական և բնանկարչական թեմաների վրա՝ Գուրոսը ջանաբար արձանագրել է իր հայրենի քաղաքի և Սյունիքի շրջանի կենցաղը, մշակույթն ու պատմա-ճարտարապետական միջավայրը։ Նրա լուսանկարների շնորհիվ այսօր հնարավոր է բավականին հստակ պատկերացում կազմել սյունեցիների առօրյա կյանքի ու սովորույթների մասին։

Տեղում կարելի եք ձեռք բերել «Պատկեր և պատում․ XX դարի Սյունիքը Գուրոսի լուսանկարներում» գիրքը։

Ցուցադրությունը բաց է լինելու մինչև սեպտեմբերի 6-ը: