«Արարատի թագավորության միապետների` մեզ հայտնի անունները». Միքայել Բադալյան

Ուրարտագետ Միքայել Բադալյանը ֆեյսբուքյան իր էջում գրել է. «ՌՈՒՍԱՆ, ՈՒՄ ԱՆՎԱՆՈՒՄ ԷԻՆ ՅԱՅԱ
Մեզ են հայտնի Արարատի թագավորության միապետների հետևյալ անունները՝ Արամու, Սարդուրի, Իշպուինի, Մենուա, Ինուշպուա?, Արգիշթի, Ռուսա, Մելարտուա?, Էրիմենա?: Վկայված է նաև այսպես կոչված Սարդուրի Առաջինի հայրանունը - Լուտիպրի։ Սակայն, ուրարտական և ասորեստանյան սեպագիր արձանագրությունները վկայում են այն մասին, որ Ուրարտուի արքաներից առնվազն Ռուսա Սարդուրորդին և Ռուսա Արգիշթորդին անվանվել են նաև այլ կերպ: Այսպես, Ռուսա Սարդուրորդին իրեն կոչում է Ուեդիպրի (Վեդիպրի): Այդ մասին կանդրադառնանք առանձին հաղորդմամբ:
Հետաքրքիր է, որ ասորեստանյան արքաներից Էսարհադդոնն արևի աստված Շամաշին ուղղված ուղերձ-հարցումներից մեկին հարցնում է, թե արդյոք Ռուսան, ում նրանք կոչում են Յայա, կհարձակվի Շուպրիայի վրա: Այսինքն, Ռուսա Արգիշթորդուն անվանել էին Յայա: Այստեղ ակնհայտորեն խոսքը գնում է Էսարհադդոնի ժամանակակից Ռուսա Արգիշթորդու մասին, ով հանդիսացել է Արարատի թագավորության վերջին հզոր գահակալներից մեկը: Այս հաղորդումը վկայում է, որ Արարատի երկրի արքաները կարող էին ունենալ մականուն և կամ բոլորովին այլ անուն, սակայն, գլխավորապես, իրենց արքայական իշխանության օրինականությունը մատնանշելու համար՝ հանդես գալ այլ անվամբ:
Կից՝ Ռուսա Արգիշթորդու՝ Բաստամից հայտնաբերված կնքադրոշմի վերականգնված նկարն է»: