Հայտնի է` ինչ են քննարկել Էրդողանն ու Փաշինյանը

Ինչպես հայտնել ենք, Նյու Յորքում Հայաստանի վարչապետ Նիկոլ Փաշինյանը հանդիպել է Թուրքիայի նախագահ Ռեջեփ Թայիփ Էրդողանի հետ։ Ինչպես տեղեկացնում է Թուրքիայի կառավարություն կայքէջը, Հայաստանի և Թուրքիայի ղեկավարները հանդիպման ժամանակ քննարկել են Հայաստան-Թուրքիա և Հայաստան-Ադրբեջան հարաբերությունների կարգավորման գործընթացները։ Էրդողանը հայտնել է, որ աջակցում է Հայաստանի և Ադրբեջանի միջև մնայուն խաղաղության հաստատմանը, ինչպես նաև նոր ժամանակաշրջանում առողջ բարեկամության ստեղծմանը։ Նա շեշտել է, թե այդ ամենի համար ինքը շարունակում է ջանքեր գործադրել։
Էրդողանը շեշտել է, թե Հայաստանի և Թուրքիայի միջև առանց նախապայմանների հարաբերությունների կարգավորման գործընթացում զգալի առաջընթաց է գրանցվել։ Էրդողանը պնդել է, թե անկեղծորեն աջակցում է այդ երկխոսության գործընթացի շարունակմանը։

Ստորև ներկայացնում ենք նաև ՀՀ կառավարության հաղորդագրությունը՝ հանդիպման վերաբերյալ. «ՄԱԿ-ի Գլխավոր վեհաժողովի 79-րդ նստաշրջանի շրջանակում տեղի է ունեցել Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը:
Զրուցակիցները մանրամասն անդրադարձ են կատարել Հայաստան-Թուրքիա հարաբերությունների կարգավորման գործընթացի շրջանակներում արդեն իսկ կատարված քայլերին և առկա պայմանավորվածություններին:
Ընդգծվել է կարգավորման գործընթացն առանց նախապայմանների շարունակելու և հարաբերություններին նոր ազդակ հաղորդելու պատրաստակամությունը: Կողմերը անդրադարձ են կատարել նաև տարածաշրջանային հարցերին:
Վարչապետ Փաշինյանը նախագահ Էրդողանին տեղեկացրել է Հայաստան-Ադրբեջան կարգավորման գործընթացի առկա իրավիճակի, հարաբերությունների կարգավորման պայմանագրի ստորագրման պատրաստակամության, ինչպես նաև ՀՀ կառավարության «Խաղաղության խաչմերուկ» նախաձեռնության մասին»: