Արևելյան Եվրոպայում, հնարավոր է, անապատներ ի հայտ գան

Հարավային Եվրոպայի երկրները անապատացման վտանգի տակ են, եթե գլոբալ տաքացումը գերազանցի երեք աստիճան Ցելսիուսը, ասել է ՄԱԿ-ի Կլիմայի փոփոխության միջկառավարական հանձնաժողովի նախագահ Ջիմ Սքին: Նրա խոսքերը հայտնում է The Daily Telegraph-ը։
«Ամբողջ Եվրոպան խոցելի է, հատկապես Միջերկրական ծովի ավազանը: Մենք արդեն տեսնում ենք, որ անապատացումը տեղի է ունենում ոչ միայն Հյուսիսային Աֆրիկայում, այլև Եվրոպայի հարավային ծայրամասերում, ինչպիսիք են Հունաստանը, Պորտուգալիան և Թուրքիան»,- ասել է Սքին:

Նրա խոսքով՝ գլոբալ տաքացում ըստ Ցելսիուսի երեք աստիճանով կարող է տեղի ունենալ մինչև 2100 թվականը։ Միևնույն ժամանակ, Արևմտյան Եվրոպան և Մեծ Բրիտանիան մինչև դարավերջ կբախվեն էլ ավելի մեծ տաքացման՝ մինչև հինգ աստիճան ըստ Ցելսիուսի:

Գլոբալ տաքացման ամենամեծ ռիսկերից մեկը կարող է լինել տաք և խոնավ կլիմայի զարգացումը: Սքին նշել է, որ դա կարող է տնտեսական խնդիրներ առաջացնել, մասնավորապես, Լեհաստանը կարող է դժվարություններ ունենալ կարտոֆիլի աճեցման հարցում, իսկ Իտալիայում կանհետանան կոշտ ցորենի սորտերը, որոնք օգտագործվում են մակարոնեղենի արտադրության մեջ։

Փորձագետն ասել է, որ մարդկությունն արդեն բաց է թողել գլոբալ տաքացումը Ցելսիուսի մեկուկես աստիճանից ցածր պահելու հնարավորությունը, և «հերոսական ջանքեր» կպահանջվեն երկու աստիճանից ցածր պահելու համար: Սքիի խոսքով՝ կլիմայի փոփոխությունն այլևս խնդիր չէ ապագա տասնամյակների համար, այն տեղի է ունենում հիմա, և մարդկությունը պետք է հարմարվի դրան։