Վերանորոգվում է Վայոց ձորի բացառիկ հուշարձաններից մեկը` Զորաց տաճարը

Այս տարվա մայիսից մեկնարկել են Վայոց ձորի մարզի Եղեգիս գյուղում գտնվող Զորաց տաճարի ամրակայման և տանիքածածկերի վերանորոգման մեծածավալ աշխատանքներ:

Շինարարական աշխատանքները կավարտվեն 2025 թվականի մայիս ամսին:
Հիշեցնենք, որ 14-րդ դարով թվագրվող Զորաց տաճարն իր հորինվածքով եզակի է հայկական ճարտարապետության մեջ, քանի որ շինությունը կազմված է միայն տանիքի տակ առնված արևելյան խորանից և երկու կողմից կից ավանդատներից: Եկեղեցին չունի ներքին սրահ: Տաճարը կառուցել է Սյունյաց նահանգի մետրոպոլիտ Ստեփանոս Տարսայիճը (1324-1331թթ.):

Որոշ ուսումնասիրողների կարծիքով՝ Զորաց տաճարը զինվորների համար նախատեսված եկեղեցի է եղել։ Խորանի անսովոր բարձրությունը թույլ է տվել ենթադրել, որ զինվորները խորանի առջև կանգնել և պատարագին մասնակցել են ձիու վրա նստած։ Մարտի մեկնելուց առաջ նրանք այստեղ երդում են տվել, օրհնություն ստացել, որից էլ եկեղեցին ստացել է իր Զորաց անունը։