Երկուշաբթի, 23 փետրվարի, 2026 թ.
|
Ստեփանակերտում`   +6 °C

«Թրամփի ընտրվելով՝ Հայաստանը ո´չ փրկվելու է և ո´չ էլ կործանվելու». Թաթուլ Հակոբյան

«Թրամփի ընտրվելով՝ Հայաստանը ո´չ փրկվելու է և ո´չ էլ կործանվելու». Թաթուլ Հակոբյան
163
Հինգշաբթի, 07 նոյեմբերի, 2024 թ., 10:36

Լրագրող Թաթուլ Հակոբյանի ֆեյսբուքյան գրառումը. «Հայաստանում տպավորություն էր ստեղծվել, որ քաղաքականապես ակտիվ հանրության մեծ մասը ակնկալում էր և ցանկանում Քամալա Հարիսի հաղթանակը ԱՄՆ ընտրություններում:

Երկրորդ տպավորությունն ու ակնկալիքն այն էր, որ Հարիսի հաղթանակի դեպքում ԱՄՆ-ն աջակցելու է Հայաստանին՝ Ադրբեջանի կողմից հնարավոր նոր ագրեսիայի դեպքում:

Հաղթեց Դոնալդ Թրամփը, որի նախագահության նախորդ շրջանը համընկել էր 2020-ի մեր սարսափելի պարտության հետ: 2023-ի սեպտեմբերյան աղետն ու բռնի տեղահանությունը Արցախից, տեղի է ունեցել Բայդեն-Հարիս նախագահության շրջանում:

Երբ հանրությունը կամ քաղաքական էլիտան իր անվտանգությունը փնտրում է հազարավոր կիլոմետրեր հեռվում, դա ուղղակի նշանակում է, որ մեր արտաքին քաղաքականության հիմքում դրված է երրորդ ուժին ապավինելու կործանարար քաղաքականությունը, անկախ նրանից, թե ինչ է այդ երրորդ ուժի անունը՝ Ամերիկա, Ռուսաստան կամ Եվրոպա:

Հայաստանը իր անվտանգությունը պետք է փնտրի առաջին հերթին իր ներսում և անմիջական շրջապատում: Մեր անմիջական շրջապատը Վրաստանը, Ադրբեջանը, Թուրքիան և Իրանն են: Անշուշտ, պետք է նաև օգտվել գերտերությունների հնարավոր օժանդակությունից:

Վիլսոնյան սինդրոմը, ռուսական փրկությունն ու եվրոպական հովանոցը պատրանքային հույսեր են: Մենք այլ աշխարհում ենք ապրում, մեր հարևանությունը չենք կարող փոխել, ինչպես և աշխարհագրությունը:

Թրամփի ընտրվելով՝ Հայաստանը ո´չ փրկվելու է և ո´չ էլ կործանվելու»:

Աղբյուրը`   Թաթուլ Հայոբյան