ԱԺ պատգամավորի՝ թմրանյութային սկանդալի կենտրոնում հայտնված քեռորդին` Վարուժան Խոջումյանը, դուրս եկավ ՔՊ-ից

Ազգային ժողովի պատգամավոր, Գյումրու քաղաքապետի թեկնածու Կարեն Սարուխանյանի քեռորդին՝ Վարուժան Խոջումյանն, ով օրերս Գյումրու ավագանու ՔՊ խմբակցության անդամ Պարգև Գևորգյանի հետ ձերբակալվել էր թմրանյութ պահելու ու օգտագործելու կասկածանքով, այնուհետ ազատ արձակվել, դուրս է եկել «Քաղաքացիական պայմանագիր» կուսակցությունից։

Նա կուսակցության Գյումրու տարածքային կազմակերպության խորհրդի անդամ էր։

Իր որոշման մասին նա գրել է ֆեյսբուքյան իր էջում. «Հարգելի՛ գյումրեցիներ, «Քաղաքացիական պայմանագիր» կուսակցության սիրելի՛ անդամներ,
հաշվի առնելով վերջին օրերի իրադարձություններն, ինչպես նաև որոշ լրատվականների բարձրացրած աղմուկն իմ անձի շուրջ, որոշում եմ կայացրել սեփական դիմումիս համաձայն դուրս գալ «Քաղաքացիական պայմանագիր» կուսակցության Գյումրու տարածքային կազմակերպության խորհրդի կազմից և «Քաղաքացիական պայմանագիր» կուսակցությունից։
Կայացրել եմ նման որոշում, քանի որ չեմ ուզում իմ անձի հետ կապված որևէ թեմա վատ անրադառնա «Քաղաքացիական պայմանագիր» կուսակցության և ՀՀ ԱԺ պատգամավոր Կարեն Սարուխանյանի վարկանիշի վրա, քանզի քաջ գիտակցում եմ առաջիկայում սպասվող ՏԻՄ ընտրությունների կարևորությունը և գիտեմ նաև, որ որոշ շահագրգիռ անձիք հենց այդ նպատակով են շարունակելու շահարկումներ անել»։

Հիշեցնենք, որ ֆոտոլրագրող Գագիկ Շամշյանը հայտնել էր, որ նոյեմբերի 9-ին Գյումրի քաղաքի Նեկրասովի փողոցի 1/4 հասցեի մոտ «Opel» մակնիշի ավտոմեքենայից ապօրինի թմրանյութ պահելու և պատրաստելու կասկածանքով ձերբակալվել են Գյումրի քաղաքի բնակիչներ 34-ամյա Պարգև Գևորգյանն և 32-ամյա Վարուժան Խոջումյանը։ Վ. Խոջումյանի մոտ հայտնաբերվել է ընդհանուր 2.1 գ թղթե փաթեթ՝ լցված մուգ շագանակագույն չորացված մանրացված զանգվածով և մոխրացված հետքերով կաթուցիչ: Վ. Խոջումյանը իրավապահներին հայտնել է, որ հայտնաբերվածը պատկանում է իրեն, հանդիսանում է «խիմկա» տեսակի թմրամիջոց, որը պատրաստել է առավոտյան, Ղարիբջանյան գյուղ տանող ճանապարհին հարակից դաշտերի մոտ վայրաճ «Կանեփ» տեսակի բույսից, պահել է իր մոտ անձնական օգտագործելու համար: Նա հայտնել է նաև, որ «Թելեգրամ» հավելվածով 13.000 դրամով ձեռք է բերել «Կրիստալ» տեսակի թմրամիջոց, որը թողել է ընկերոջ՝ Պ. Գևորգյանի ավտոմեքենայի մեջ: