«Ինձ ներկայացրեցին ցուցակ, որտեղ չկային Երվանդ Քոչարի որոշ գործեր». Ռուբեն Քոչար

«Երվանդ Քոչարն իր ամբողջ ունեցվածքը ժառանգել էր տիկնոջը: Մայրս էլ ստեղծել է «Երվանդ Քոչար»-ի թանգարանը: Մենք՝ եղբորս հետ, մեզ ժառանգված գործերը տրամադրեցինք թանգարանին: Ես հանձնել եմ 21 գործ»,-ասուլիսի ժամանակ ասաց հայ անվանի գեղանկարիչ, քանդակագործ Երևանդ Քոչարի որդին՝ Ռուբեն Քոչարը: Նա նշեց, որ մայրը թանգարանի ֆոնդապահ, այնուհետև տնօրեն էր նշանակել իրենց հարսին՝ Լալա Մարտիրոսյան-Քոչարին:

«Երբ տարիներ անց ես վերադարձա հայրենիք և գնացի թանգարան, Լալա Մարտիրոսյան-Քոչարը ուրախ չէր իմ գալու համար: Երբ մոտեցավ Երվանդ Քոչարի 125 հոբելյանական ամյակը, ես որոշեցի և քայլեր արեցի, որպեսզի Երվանդ Քոչարի գործերը Հայաստանից հանենք դուրս: Հայաստանում բոլորս գիտենք, տեսնում ենք: Ասացի՝ իմ սեփականություն հանդիսացող գործերը կհանեմ և կցուցադրեմ: Երբ անցյալ տարեվերջին հարցրեցի, թե այդ գործերը որտեղ են, Լալա և Կարինե Քոչարներն ինձ բերեցին ցուցակ, կողքին էլ նշված, թե այս, այս գործերը չկան: 7 գործ չկար: Չեն հիմնավորել, թե ինչու չկա»,- ասաց Քոչարը:

Հիշեցնենք՝ ՔՈՉԱՐ մշակութային հիմնադրամը երեկ հայտնել էր, որ Երվանդ Քոչարի թանգարանից անհետացել են նկարչի 7 ստեղծագործություններ՝ մոտ 500.000 դոլար արժողությամբ: