Իսրայելը հրթիռակոծում է Սիրիայի զինապահեստները, զենքի գործարաններն ու ավիաբազան

Իսրայելը բազմաթիվ հարվածներ է հասցնում Սիրիային. նշվում է, որ նրանց թիրախը զենքի պահեստներն ու ռազմական գործարաններն են։ Այս մասին գրում է Times of Israel-ը։

Հաղորդվում է, որ իսրայելական օդուժը հարվածներ է հասցրել Սիրիայի հարավում գտնվող Դարաա և Սուվեյդա շրջաններին՝ Իսրայելի սահմանի մոտ, ինչպես նաև մայրաքաղաք Դամասկոսի մոտ գտնվող «Մեզզե» ավիաբազային։ Իսրայելական բանակը նաև հաստատել է, որ իր ուժերը Գոլանի բարձունքներից առաջ են շարժվել դեպի սիրիական տարածք։
Ավելի վաղ ԶԼՄ-ները գրել էին, որ իսրայելցի զինվորականները ծրագրում են գրոհել «ռազմավարական նշանակություն ունեցող զենքի պահեստները»՝ կանխելու համար դրանք Սիրիայի նոր կառավարության ձեռքն ընկնելու հավանականությունը։ Իսրայելը մտահոգված է իշխանության եկած սիրիացի ապստամբների «հիմնական գաղափարախոսությամբ»։