Բողոքի երթերը Թբիլիսիում ավելի բազմազան են դառնում

Վրաստանում բողոքի ցույցերի 23-րդ օրը հագեցած էր երթերով ու բողոքի ակցիաներով՝ ընդգրկելով հասարակության տարբեր շերտեր։ Այս մասին հաղորդում են վրացական լրատվամիջոցները։
Բողոքի ակցիաների պահանջները ներառում են՝ նոր ընտրություններ, կալանավորված ցուցարարների ազատ արձակում և երկրի վերադարձ եվրոպական ուղի։
Նախօրեին հաղորդվել էր նաև, որ վրացի ներգաղթյալները Վրաստանում եվրոբողոքի ակցիաներին կաջակցեն Բեռլինում և Բարսելոնայում բարեգործական համերգի և բողոքի ցույցի կազմակերպմամբ։
Հիշեցնենք, որ Վրաստանում հակակառավարական ցույցերն սկսվեցին նոյեմբերի 28-ին՝ այն բանից հետո, երբ կառավարությունը հայտարարեց ԵՄ-ին անդամակցելու բանակցությունները մինչև 2028 թվականը դադարեցնելու մասին։