Իսրայելը քննադատել է Հռոմի պապին

Գազայի հատվածում իրականացվող գործողությունների մասին Հռոմի պապ Ֆրանցիսկոսի հայտարարությունները կտրված են ՀԱՄԱՍ-ի հետ Իսրայելի հակամարտության համատեքստից, այս մասին հայտարարել է Իսրայելի ԱԳՆ-ն, գրում է The Times of Israel-ը։
Դեկտեմբերի 21-ին պոնտիֆիկոսը սուրբծննդյան ամենամյա ուղերձում նշել էր․ «Երեկ ռմբակոծել են երեխաների: Սա դաժանություն է։ Սա պատերազմ չէ»: Reuters-ը գրել էր, որ Հռոմի պապի խոսքերը «ըստ երևույթին, հղում են» դեկտեմբերի 20-ին Գազայի հատվածում Իսրայելի կողմից հասցված հարվածներին։ Հարձակման հետևանքով զոհվել էր առնվազն 25 պաղեստինցի, այդ թվում՝ յոթ երեխա, նշում էր գործակալությունը՝ վկայակոչելով բժիշկներին։

Իսրայելի ԱԳՆ-ն ասել է, որ Հռոմի պապը «ցավոք, որոշել է անտեսել» այն փաստը, որ իսրայելցի զինվորականների գործողությունները «ուղղված են երեխաներին որպես կենդանի վահան օգտագործող ահաբեկիչների դեմ»։ Գերատեսչությունն ընդգծել է, որ մեղքը պետք է բարդել բացառապես ՀԱՄԱՍ-ի զինյալների վրա։ «Բավական է երկակի ստանդարտներ օգտագործել»,- ավելացրել է նախարարությունը: