Հայտնի է` ինչ են քննարկել Ադրբեջանն ու Իրանը

Ադրբեջանի Հանրապետության նախագահ Իլհամ Ալիևն այսօր ընդունել է Իրանի Իսլամական Հանրապետության Ազգային անվտանգության բարձրագույն խորհրդի քարտուղար Ալի Աքբար Ահմադիանին։

Երկրի ղեկավարն ասել է, որ Ալի Աքբար Ահմադիանի այցն Ադրբեջան լավ հնարավորություն է ստեղծում՝ քննարկելու երկկողմ հարաբերությունների զարգացման հեռանկարները։

Ալի Աքբար Ահմադյանն Ադրբեջանի ղեկավարին է փոխանցել Իրանի գերագույն առաջնորդ Ալի Խամենեիի և նախագահ Մասուդ Փեզեշքիանի ողջույնները։

Իլհամ Ալիևը շնորհակալություն է հայտնել ողջույնների համար և խնդրել է իր ողջույնները փոխանցել Իրանի գերագույն առաջնորդին ու նախագահին։

Ալի Աքբար Ահմադիանն ընդգծել է, որ Ադրբեջանի և Իրանի մշակութային, պատմական, կրոնական և քաղաքակրթական կապերը տարածաշրջանում նմանը չունեն, և անհնար է գտնել նման հնագույն կապեր ունեցող երկու երկրներ։ Նա շնորհավորել է Ադրբեջանին իր «տարածքներն օկուպացիայից ազատելու, տարածքային ամբողջականության և ինքնիշխանության ամբողջական վերականգնման կապակցությամբ և ասել, որ իրենք շատ ուրախ են այս ամենի համար»։

Հանդիպման ընթացքում քննարկվել են Ադրբեջանի Հանրապետության և Իրանի Իսլամական Հանրապետության միջև քաղաքական, տնտեսական, տրանսպորտային, էներգետիկ և այլ ոլորտներում համագործակցության հարցեր։

Իլհամ Ալիևն ասել է, որ երկու երկրների ժողովուրդները սերտորեն կապված են միմյանց հետ և ընդգծել երկու պետությունների միջև բարեկամական և եղբայրական հարաբերությունների զարգացման կարևորությունը։ Երկրի ղեկավարն ասել է, որ Ադրբեջանը միշտ առանձնահատուկ նշանակություն է տալիս բոլոր ոլորտներում Իրանի Իսլամական Հանրապետության հետ հարաբերությունների զարգացմանը։ Գոհունակությամբ նշվել է, որ Իրանում նոր նախագահի ընտրությունից հետո այս երկիր են այցելել ադրբեջանական մի քանի բարձրաստիճան պատվիրակություններ։ Իլհամ Ալիևը շնորհակալություն է հայտնել շնորհավորանքների համար։ Երկրի ղեկավարն ընդգծել է, որ իբրև թե «օկուպացիայի» ընթացքում Հայաստանը «լիովին ավերել է Ադրբեջանի այս տարածքները, պղծել մշակութային և կրոնական հուշարձանները, այդ թվում՝ մզկիթները, խոզեր ու կովեր պահել աղոթատեղիներում»։

Իլհամ Ալիևն ընդգծել է, որ Ադրբեջանն իբրև թե հանդես է գալիս տարածաշրջանային երկրների կողմից տարածաշրջանային խնդիրների լուծման օգտին, և այս առումով հենց Ադրբեջանն է նախաձեռնել «3+3» ձևաչափը, որը տարածաշրջանային համագործակցության բնույթ է կրում։ Եվս մեկ անգամ նշվել է տարածաշրջան արտատարածաշրջանային արտաքին ուժերի ներգրավման անթույլատրելիությունը։

Հանդիպմանը շոշափվել է Հյուսիս-Հարավ տրանսպորտային միջանցքի զարգացման կարևորությունը և այդ համատեքստում Ադրբեջանի, Ռուսաստանի և Իրանի միջև եռակողմ համագործակցության ձևաչափը, և նշվել է, որ Ադրբեջանն այս ուղղությամբ բեռնափոխադրումների մեծ ծավալ ունի։ Մտքերի փոխանակություն է տեղի ունեցել նաև «Արաքսի միջանցք» ծրագրի և դրա շրջանակներում Արաքս գետի վրա Աղբենդի ուղղությամբ կամուրջների և ճանապարհային տրանսպորտի ենթակառուցվածքների կառուցման շուրջ։ Նշվել է այս նախագծի առանձնահատուկ նշանակությունը մարզային տրանսպորտային կապերի զարգացման տեսանկյունից։ Քննարկվել են Ադրբեջանի և Իրանի միջև Արաքս գետի երկայնքով հիդրոէլեկտրակայանների կառուցման նախագծերը։ Բարձրացվել է Ադրբեջանի, Ռուսաստանի և Իրանի միջև էլեկտրահաղորդման գծերի միացման հարցը, և ընդգծվել է այդ ուղղությամբ համագործակցության մեծ ներուժը։

Զրույցի ընթացքում հաղորդվել է, որ ադրբեջանա-իրանական միջկառավարական հանձնաժողովի հաջորդ նիստը տեղի կունենա մոտ ժամանակներս։ Հույս է հայտնվել, որ հանդիպման ընթացքում հնարավորություն կընձեռվի քննարկել պետությունների ղեկավարների նշած կոնկրետ նախագծերը։