Երեքշաբթի, 24 մարտի, 2026 թ.
|
Ստեփանակերտում`   +8 °C

«Հայաստանն ու Ռուսաստանը շարունակում են լինել ռազմավարական դաշնակիցներ»․ Սուրեն Պապիկյան

«Հայաստանն ու Ռուսաստանը շարունակում են լինել ռազմավարական դաշնակիցներ»․ Սուրեն Պապիկյան
486
Չորեքշաբթի, 15 հունվարի, 2025 թ., 20:54

«Հայ-ռուսական հարաբերությունները շարունակվում են: Ո՛չ Հայաստանն է իր տեղից հեռանալու, ո՛չ Ռուսաստանը: Այս մասին 2024 թվականն ամփոփող ասուլիսում ընդգծեց Հայաստանի պաշտպանության նախարար Սուրեն Պապիկյանը՝ անդրադառնալով Հայաստանի կատարած վճարումների դիմաց Ռուսաստանից զենքի չմատակարարմանը:

«Մենք շարունակում ենք լինել ռազմավարական դաշնակիցներ: Բնականաբար, մենք ունենք նաև գործող պայմանագրեր: Կարող է և պետք է ունենանք սպասարկման պայմանագրեր: Սրանք հարցեր են, որոնցից ո՛չ ռուսական կողմը, ո՛չ մենք չենք խուսափում, և պետք է չխուսափենք»,- նշեց Պապիկյանը:

Նախարարը հիշեցրեց՝ Ֆինանսների նախարարը հայտնել է, որ Հայաստանի և Ռուսաստանի ֆինանսների նախարարությունների միջև ձեռք է բերվել պայմանավորվածություն, որով մեր կողմից վճարված գումարը միջպետական պարտքից պետք է պակասեցվի: «Կդժվարանամ ասել՝ այն կյանքի կոչման որ հատվածում է, բայց նմանատիպ պայմանավորվածություն ձեռք է բերվել: Պետք է ասեմ, որ սա միակ ընթացիկ պայմանագիրը չի եղել Հայաստանի և Ռուսաստանի միջև: Բնական է՝ կան պարտավորություններ, որոնք ուշացումների բերումով կարող են ունենալ իրենց պայմանագրային հետևանքները՝ տույժ-տուգանքներ և այլն: Բայց նաև պայմանագրեր կան, որոնք պատշաճ կատարվում են»,- նշեց Պապիկյանը՝ մանրամասներ չհայտնելով: