Չորեքշաբթի, 15 ապրիլի, 2026 թ.
|
Ստեփանակերտում`   +8 °C

100-ամյա գործընկերություն Ուկրաինայի և Մեծ Բրիտանիայի միջև. հայտնի են համաձայնագրի մանրամասները

100-ամյա գործընկերություն Ուկրաինայի և Մեծ Բրիտանիայի միջև. հայտնի են համաձայնագրի մանրամասները
903
Ուրբաթ, 17 հունվարի, 2025 թ., 00:30

Ուկրաինայի նախագահի աշխատակազմը հրապարակել է Ուկրաինայի ու Մեծ Բրիտանիայի և Հյուսիսային Իռլանդիայի Միացյալ Թագավորության միջև 100-ամյա գործընկերության համաձայնագրի տեքստը, որը նախատեսում է անվտանգության կապերի խորացում և գործընկերության ամրապնդում ապագա սերունդների համար։
Ուկրաինական կողմից փաստաթուղթը ստորագրել է նախագահ Վլադիմիր Զելենսկին, իսկ բրիտանական կողմից՝ վարչապետ Քիր Սթարմերը։

Փաստաթղթի ներածական մասում, ի թիվս այլ բաների, նշվում է Ուկրաինայի եվրոպական և եվրատլանտյան նկրտումների աջակցությունը և Մեծ Բրիտանիայի աջակցությունը «Ուկրաինայի՝ ՆԱՏՕ-ին անդամակցելու անշրջելի ճանապարհին»։

Նշվում է նաև, որ Ուկրաինան «կշարունակի զարգացնել կոռուպցիայի դեմ պայքարի և կանխարգելման իր կարողությունը անվտանգության ոլորտում համագործակցության համաձայնագրով ստանձնած պարտավորություններին համապատասխան, մասնավորապես՝ շարունակելով աջակցել անկախ և համապատասխան ռեսուրսներով հակակոռուպցիոն ինստիտուտներին»:

Համաձայնագրի հիմնական մասը բաղկացած է 14 հոդվածից։
Մասնավորապես, պաշտպանական կարողությունների ամրապնդման մասին հոդվածում ասվում է, որ Ուկրաինան և Մեծ Բրիտանիան կխորացնեն համագործակցությունը, կամրապնդեն իրենց ռազմական և պաշտպանական արդյունաբերական կարողությունները, ներառյալ զինված ուժերի զարգացումը և պաշտպանական արդյունաբերական բազաների միջև համագործակցությունը, կամրապնդեն Ուկրաինայի պաշտպանական գնումների համակարգերը և տեխնոլոգիաներ կփոխանցեն համատեղ պաշտպանական արտադրանքի արտադրության համար:

Խոսվում է նաև ոլորտներ զարգացնելու մասին, որոնց կարևորությունը եվրոատլանտյան խաղաղության և կայունության համար շատ ավելի հեռուն է գնում, քան պատերազմի սահմաններն են՝ «գիտակցելով Ուկրաինայի կարևոր դերը եվրոատլանտյան անվտանգության պաշտպանության գործում և հատուկ ուշադրություն դարձնելով Ուկրաինայի փոխգործունակությանը և ներդրմանը՝ որպես ՆԱՏՕ-ի ապագա դաշնակցի»:

Ծովային անվտանգության մասին հոդվածը հայտարարում է ծովային անվտանգության երկարաժամկետ համակարգային սպառնալիքների և մարտահրավերների դեմ պայքարելու մտադրության մասին՝ նպատակ ունենալով վերականգնելու նավագնացության ազատությունը։

«Կողմերը համագործակցություն են հաստատում ծովային անվտանգության ոլորտում, մասնավորապես՝ նպատակ ունենալով ամրապնդել անվտանգությունը Բալթիկ, Սև և Ազովի ծովերում»,- ասվում է դրանում։

Փաստաթուղթը նաև նախատեսում է միջոցներ ձեռնարկել պատասխանատվության ենթարկելու համար միջազգային իրավունքի կոպիտ խախտումներ կատարած պետություններին:

Միգրացիայի մասին հոդվածում ասվում է, որ կողմերը աստիճանաբար քայլեր կձեռնարկեն՝ հեշտացնելու քաղաքացիների ճանապարհորդությունն ու այցելությունները միմյանց երկրներ:

Համաձայնագիրն ուժի մեջ կմնա 100 տարի՝ ուժի մեջ մտնելու օրվանից, եթե կողմերից որևէ մեկը չդադարեցնի այն սահմանված ընթացակարգով։ Փաստաթղթում հնարավոր է փոփոխություններ կատարել նաև կողմերի փոխադարձ համաձայնությամբ։ Կողմերը կարող են կնքել լրացուցիչ համաձայնագրեր կամ պայմանավորվածություններ սույն համաձայնագրի իրականացման համար: