«Իրանի հետ նոր համաձայնագիրը կնպաստի բոլոր ոլորտներում համագործակցությանը»․Պուտին

Ռուսաստանի և Իրանի միջև Համապարփակ ռազմավարական գործընկերության համաձայնագիրը խթան կհանդիսանա բոլոր ոլորտներում գործնական համագործակցության համար։ Այս մասին հայտարարել է ՌԴ նախագահ Վլադիմիր Պուտինը Իրանի նախագահ Մասուդ Պեզեշկիանի հետ հանդիպման ժամանակ։

«Ձեր այսօրվա այցը առանձնահատուկ նշանակություն ունի, քանի որ մենք ոչ միայն հնարավորություն կունենանք քննարկել և կքննարկենք մեր համագործակցության բոլոր ոլորտները, այլ նաև կստորագրենք Ռուսաստանի և Իրանի միջև համապարփակ ռազմավարական գործընկերության մասին հիմնական համաձայնագիրը, որը լրացուցիչ խթան կհաղորդի մեր համագործակցության գործնականում բոլոր ոլորտներին»,- ասել է ՌԴ ղեկավարը։

Իրանի նախագահն իր հերթին հույս է հայտնել, որ Ռուսաստանի հետ Գործընկերության համաձայնագիրը կդառնա «առաջ շարժվելու ամուր հիմք»։