3 գերու դիմաց Իսրայելը բանտից կազատի 110 պաղեստինցի բանտարկյալի

Իսրայելը միջնորդների միջոցով ստացել է 2023 թվականի հոկտեմբերի 7-ի հարձակման ժամանակ Համասի կողմից վերցված 8 պատանդների ցուցակը, որոնք պետք է ազատ արձակվեն հինգշաբթի օրը՝ հունվարի 30-ին։ Նրանց թվում են 3 իսրայելցի և 5 օտարերկրյա աշխատողներ՝ Թաիլանդի քաղաքացիներ։ Պատանդների ընտանիքներն արդեն ծանուցվել են նրանց ծրագրված ազատ արձակման մասին։

Ինչպես հայտնում է Ynet-ը, վաղը պետք է ազատ արձակվեն կին զինվոր Ագամ Բերգերը, քաղաքացիական անձ Արբել Յեհուդը և 80-ամյա Գադի Մոզեսն, ով առևանգվել էր Կիբուց Նիր Օզից։ Մոզեսը և Յեհուդը գերի էին «Իսլամական ջիհադի» մոտ, իսկ Բերգերը գերի էր ՀԱՄԱՍ-ի մոտ: 3-ի դիմաց Իսրայելը բանտից կազատի 110 պաղեստինցի բանտարկյալի։

Հրապարակման համաձայն՝ նրանցից 30-ը ցմահ ազատազրկման դատապարտված մարդասպաններ են, 30-ը՝ կանայք և երեխաներ, 30-ը՝ 50 տարեկանից բարձր բանտարկյալներ, որոնց պատժի լրանալուն մնացել է 15 տարուց պակաս կամ բժշկական օգնության կարիք ունեն, 20-ը դատապարտվել է մինչև 15 տարվա ազատազրկման։

Ազատված թայլանդցի պատանդների անունները դեռ չեն հրապարակվում։ Նրանց ազատ արձակումն ի սկզբանե նախատեսված չէր՝ որպես Իսրայել-ՀԱՄԱՍ գործարքի առաջին փուլի մաս, քանի որ նրանք բոլորը երիտասարդ տղամարդիկ են, և Իսրայելը չէր պնդել նրանց ազատ արձակումը՝ որպես առաջնահերթություն:

Պաղեստինցի բանտարկյալների հետ իսրայելցի պատանդների հերթական փոխանակումը նախատեսվում է իրականացնել շաբաթ օրը՝ փետրվարի 1-ին. նախատեսվում է, որ ՀԱՄԱՍ-ը կազատի ևս երեք պատանդի: