Կանադայի արտգործնախարարը կարևորել է արցախահայության վերադարձի ապահովումը

Կանադայի արտգործնախարար Մելանի Ժոլին Հայ դատի Կանադայի հանձնախմբին ուղղված իր նամակում անդրադարձել է Լեռնային Ղարաբաղի հայության իրավունքների պաշտպանության և Հայաստանի Հանրապետության անվտանգային խնդիրներին։ Այս մասին հաղորդագրություն է տարածել ՀՅԴ բյուրոյի հայ դատի կենտրոնական գրասենյակը։

Մասնավորապես, նշվում է, որ Բաքվում հայ ռազմագերիների և Լեռնային Ղարաբաղի նախկին առաջնորդների՝ շարունակվող կեղծ դատավարությունների ֆոնին նախարար Ժոլին խստորեն դատապարտում է Ադրբեջանի ագրեսիվ հռետորաբանությունը և կոչ է անում անվերապահ ազատ արձակել Ադրբեջանում պահվող բոլոր հայ ռազմագերիներին։

Ժոլին նաև կոչ է անում հարգել Հայաստանի ինքնիշխանությունն ու տարածքային ամբողջականությունը, ապահովել հայ խաղաղ բնակիչների անվտանգ և արժանապատիվ վերադարձն իրենց հայրենիք, պաշտպանել հայկական մշակութային ժառանգությունը և կարգավորել Լեռնային Ղարաբաղի հակամարտությունը՝ ԵԱՀԿ Մինսկի խմբի շրջանակներում։

Արտգործնախարարը շեշտել է Հարավային Կովկասում արդար և կայուն խաղաղության հաստատման անհրաժեշտությունը՝ ուժի կիրառման և դրա կիրառման սպառնալիքի բացառման, տարածքային ամբողջականության և ինքնորոշման իրավունքի շրջանակներում։