ՀԱՄԱՍ-ն Իսրայելին մեղադրում է համաձայնագրի հումանիտար կողմերն անտեսելու մեջ

Պաղեստինյան ՀԱՄԱՍ շարժումն Իսրայելին մեղադրել է Գազայի հրադադարի համաձայնագրով նախատեսված հումանիտար հարցերին խոչընդոտելու մեջ և միջնորդներին ու համաձայնագրի երաշխավորներին կոչ է արել միջամտել։
«Շարունակում են խուսափել հրադադարի համաձայնագրի հումանիտար հարցերից և միտումնավոր ձգձգում ու խոչընդոտում են տարրական կարիքների, մասնավորապես վրանների, վառելիքի մատակարարումն ու փլատակների մաքրման համար ծանր տեխնիկայի մուտքը»,- ասված է ՀԱՄԱՍ-ի հայտարարության մեջ:

Հիշեցնենք, որ ՀԱՄԱՍ-ն ու Իսրայելը համաձայնության էին եկել հրադադարի մասին համաձայնագրի շուրջ՝ Կատարի, Եգիպտոսի և ԱՄՆ-ի միջնորդությամբ: Համաձայնագիրը կիրականացվի երեք փուլով։ Հունվարի 19-ից սկսած առաջին փուլը, որը տևելու է 42 օր, ներառում է 33 իսրայելցի պատանդների և ավելի քան 1890 պաղեստինցի բանտարկյալների ազատ արձակումը։ Հաջորդ փուլերի շուրջ բանակցությունները շարունակվում են։