Զելենսկին հնարավոր է համարել Պուտինի հետ ուղիղ բանակցությունները

Ուկրաինայի նախագահ Վլադիմիր Զելենսկին բրիտանացի լրագրող Պիրս Մորգանին տված հարցազրույցում հայտնել է, որ պատրաստ է ուղիղ բանակցությունների Ռուսաստանի նախագահ Վլադիմիր Պուտինի հետ, եթե կարգավորման շրջանակներում այլ տարբերակներ չլինեն։

«Եթե դա լինի միակ փոխդասավորվածությունը, որով կարող ենք խաղաղության հասնել Ուկրաինայի քաղաքացիների համար և չկորցնել մարդկանց, իհարկե, կընդունենք այն», - ասել է Զելենսկին՝ պատասխանելով հարցին, թե ինչպե՞ս կզգար իրեն Պուտինի հետ դեմ առ դեմ նստած՝ ԱՄՆ-ի և ԵՄ-ի մասնակցությամբ հնարավոր բանակցությունների ժամանակ։

Ուկրաինայի նախագահը հավելել է, որ «բարի չի գտնվի» ՌԴ նախագահի նկատմամբ, քանի որ նրան համարում է իր թշնամին և վստահ է, որ Պուտինը նույն վերաբերմունքն ունի։