Թրամփը Հորդանանի նախագահի հետ քննարկել է Գազայի հատվածից պաղեստինցիներին տարհանելու ծրագիրը

ԱՄՆ-ի նախագահ Դոնալդ Թրամփը Սպիտակ տանը հանդիպել է Հորդանանի թագավոր Աբդալլահ Երկրորդի հետ՝ քննարկելու Գազայի հատվածից պաղեստինցիներին տարհանելու ծրագիրը։

Թրամփն ասել է, որ Հորդանանում և Եգիպտոսում հող կգտնվի, որպեսզի պաղեստինցիները ապահով ապրեն: Նա վստահություն է հայտնել, որ 99 տոկոսով այս երկրների հետ պայմանավորվածություններ ձեռք կբերվեն։

Պաղեստինցիների՝ անկլավ վերադառնալու իրավունքի հարցում Թրամփը նշել է, որ Հորդանանի և Եգիպտոսի նոր բնակավայրերում ապրելու պայմանները զգալիորեն ավելի լավ կլինեն, քան Գազայի հատվածում։

Հորդանանի թագավորը նշել է, որ իր երկիրը պատրաստ է Գազայի հատվածից ընդունել առողջական խնդիրներ ունեցող 12000 պաղեստինցի երեխաների։

Թրամփը հավելել է, որ ԱՄՆ-ն վերահսկելու է Գազայի հատվածը. «Մենք Գազան կստանանք առանց գնելու։ Այն գնելն իմաստ չունի, այնտեղ գնելու բան չկա։ Սա Գազան է, սա պատերազմական տարածք է, մենք դա կստանանք»: