Պուտինի հետ երկար զրույցից հետո Թրամփը 1 ժամ խոսել է Զելենսկու հետ

ԱՄՆ նախագահ Դոնալդ Թրամփը Ռուսաստանի առաջնորդ Վլադիմիր Պուտինի հետ 1,5 ժամ տևած զրույցից հետո զանգահարել է Ուկրաինայի նախագահ Վոլոդիմիր Զելենսկուն։ Նախագահի աշխատակազմի հաղորդագրության համաձայն՝ ուկրաինացի և ամերիկացի առաջնորդների երկխոսությունը տևել է մոտ մեկ ժամ։ Ուկրաինայի նախագահը բացահայտել է հեռախոսազրույցի առաջին մանրամասները. «Հենց նոր խոսեցի Դոնալդ Թրամփի հետ. երկար զրույց խաղաղության հասնելու հնարավորության մասին, թիմային մակարդակով միասին աշխատելու մեր պատրաստակամության մասին։ «Մեր տեխնոլոգիական հնարավորությունների, այդ թվում՝ անօդաչու թռչող սարքերի և ժամանակակից այլ արտադրության մասին»,- ասվում է Ուկրաինայի նախագահի հայտարարության մեջ։

Զելենսկին երախտագիտություն է հայտնել ԱՄՆ նախագահին նրա հետաքրքրության համար, թե ինչ կարող են անել Վաշինգթոնն ու Կիևը միասին։

Նրա խոսքով՝ Դոնալդ Թրամփը նաև մանրամասներ է բացահայտել Վլադիմիր Պուտինի հետ իր զրույցից։ Բացի վերը նշվածից, ԱՄՆ-ի և Ուկրաինայի նախագահները պայմանավորվել են հետագա շփումների և հանդիպումների մասին։ Պետության ղեկավարն ընդգծել է, որ Ուկրաինան ցանկանում է խաղաղության հասնել ավելի շատ, քան մյուսները։

«Մենք սահմանում ենք մեր ընդհանուր քայլերն Ամերիկայի հետ՝ դադարեցնելու ռուսական ագրեսիան և երաշխավորելու հուսալի, կայուն խաղաղություն։ Ինչպես նախագահ Թրամփն է ասել՝ եկեք հասնենք դրան»,- հավելել է Ուկրաինայի նախագահը։

ԱՄՆ-ի նախագահ Դոնալդ Թրամփն իր հերթին Truth Social սոցիալական ցանցում հրապարակել է Ուկրաինայի առաջնորդ Վոլոդիմիր Զելենսկու հետ զրույցի իր տարբերակը։

«Ես հենց նոր խոսեցի Ուկրաինայի նախագահ Վոլոդիմիր Զելենսկու հետ։ Զրույցը շատ լավ անցավ։ Նա, ինչպես նախագահ Պուտինը, խաղաղություն է ցանկանում»,- ասվում է հրապարակման մեջ։

Թրամփն ասել է, որ ինքը Զելենսկու հետ քննարկել է «պատերազմի հետ կապված տարբեր թեմաներ», բայց հիմնականում՝ ուրբաթ օրը Մյունխենի անվտանգության համաժողովում ուկրաինական և ամերիկյան պատվիրակությունների պլանավորված հանդիպումը։

«Հուսով եմ, որ այս հանդիպման արդյունքները դրական կլինեն։ Ժամանակն է դադարեցնել այս անիմաստ պատերազմը, որտեղ տեղի են ունեցել զանգվածային և բոլորովին անհարկի մահեր ու ավերածություններ։ Թող Աստված օրհնի Ռուսաստանի և Ուկրաինայի ժողովրդին»,- գրել է Թրամփը։