Porsche-ն նախատեսում է կրճատել 1900 աշխատատեղ

24553

Հինգշաբթի, 13 փետրվարի, 2025 թ., 21:14

Գերմանական Porsche AG շքեղ ավտոմեքենաների արտադրողը նախատեսում է մինչև տասնամյակի վերջ կրճատել իր աշխատուժը 1900 աշխատողով՝ էլեկտրական մեքենաների պահանջարկի թուլացման և «աշխարհաքաղաքական և տնտեսական դժվար պայմանների» ֆոնին, ասվում է ընկերության հայտարարության մեջ:

Porsche-ն կկրճատի գերմանական երկու գործարանների անձնակազմը՝ առաջարկելով աշխատակիցներին փոխհատուցման փաթեթներ և խրախուսումներ վաղաժամկետ կենսաթոշակի անցնելու համար: Բացի այդ, ընկերությունը մտադիր է սահմանափակել նոր կադրերի աշխատանքի ընդունումը։ Porsche-ի նպատակն է մինչև 2029 թվականը Զուֆենհաուզենում և Վայսախում աշխատողների թիվը կրճատել 15%-ով:

Ընկերությունը նշում է, որ աշխատանքի երաշխիքային պայմանագիրը գործում է Գերմանիայում իր բոլոր աշխատակիցների համար մինչև 2030 թվականը։ Այսպիսով, մինչև նշված ժամկետի ավարտն աշխատողների ազատումը կարող է իրականացվել միայն կամավոր հիմունքներով։