Զելենսկին հրաժարվել է Ուկրաինայի հանքային ռեսուրսները հանձնել ԱՄՆ-ին․ #WP

Մյունխենի անվտանգության համաժողովի ժամանակ ԱՄՆ ներկայացուցիչները Ուկրաինայի նախագահ Վլադիմիր Զելենսկիին առաջարկել են ամերիկյան կողմին փոխանցել երկրի հանքային պաշարների 50%-ի իրավունքը։ Սակայն Զելենսկին հրաժարվել է նման համաձայնագիր ստորագրել, գրում է Washington Post-ը՝ վկայակոչելով ամերիկյան պատվիրակության աղբյուրները։
Ավելի վաղ ԱՄՆ ֆինանսների նախարար Սքոթ Բեսենտը Կիև էր տարել խաղաղության համաձայնագրի շրջանակներում ուկրաինական հազվագյուտ հողային մետաղների օգտագործման ոլորտում համագործակցության հուշագիր։ Սակայն փաստաթղթում բացակայում էին անվտանգության երաշխիքները, ուստի ուկրաինական կողմն այն ընդունել է վերանայման, հաղորդում է BBC-ն։

Մյունխենում նորացված տարբերակը հանձնվել է ԱՄՆ-ին, սակայն ամերիկյան ներկայացուցիչները հավանություն չեն տվել փոփոխություններին։ Արդյունքում Զելենսկու հանդիպումը փոխնախագահ Ջ.Դ.Վենսի հետ հետաձգվել է, հաղորդում է Reuters-ը։

Հանդիպմանը երկու կողմերը պայմանավորվել են շարունակել աշխատանքը փաստաթղթի վրա, նշել է Ուկրաինայի նախագահի մամուլի ծառայությունը։ Սակայն, ըստ Reuters-ի աղբյուրների, ԱՄՆ-ն ի սկզբանե ակնկալում էր, որ Զելենսկին կստորագրի համաձայնագիրը՝ առանց այն մանրամասն կարդալու, ինչը նրան զարմացրել է։

ԱՄՆ սենատորների հետ 90 րոպե տևած փակ հանդիպման ժամանակ Զելենսկին մտահոգություն է հայտնել առաջարկի վերաբերյալ։ Քննարկման մասնակիցներից մեկը WP-ին ասել է, որ Ուկրաինայի ղեկավարը սխալ է համարել իրենից պահանջել ստորագրել փաստաթուղթը՝ չունենալով այն ուսումնասիրելու հնարավորություն։

Հաղորդվում է նաև, որ Զելենսկին առաջարկել է համաձայնագրի սեփական տարբերակը՝ ընդգծելով, որ այն մշակվել է Ուկրաինայի Սահմանադրության համաձայն։