«Ուկրաինայում մարտերը կարող են ավարտվել մոտակա մի քանի շաբաթվա ընթացքում». Թրամփ

Ուկրաինայում մարտերը կարող են ավարտվել մոտակա մի քանի շաբաթվա ընթացքում. այս մասին ԱՄՆ նախագահ Դոնալդ Թրամփը հայտարարել է Վաշինգթոնում Ֆրանսիայի նախագահ Էմանուել Մակրոնի հետ կայացած մամուլի ասուլիսում։

«Կարծում եմ՝ պատերազմը կարող է շուտով ավարտվել։ Շաբաթների ընթացքում, կարծում եմ: Դուք այդպես չե՞ք կարծում», - ասել է Թրամփը՝ դիմելով իր ֆրանսիացի գործընկերոջը։ Մակրոնն ի պատասխան գլխով է արել։

Հանրապետականն ասել է, որ կռիվն ավարտելու վերաբերյալ համաձայնություն ձեռք բերելը «խելացի կլինի»: «Ինչը խելացի չի լինի՝ շարունակել առաջ գնալ և կորցնել երիտասարդ, գեղեցիկ մարդկանց, որոնք չպետք է մահանան», ասել է Թրամփը և հիշեցրել, որ հակամարտության հետագա շարունակությունը կարող է հանգեցնել «երրորդ համաշխարհային պատերազմի»։
Թրամփը հանդես է եկել ռուս-ուկրաինական հակամարտության շուտափույթ ավարտի օգտին նույնիսկ ԱՄՆ նախագահական ընտրություններում հաղթելուց առաջ։ Հանրապետականը բազմիցս հայտարարել է, որ իր իշխանության օրոք պայքարը չէր սկսվի։