Լավրովը հաստատել է` Պուտինը ծրագրում է հրավիրել ԱՄՆ-ին` նախագիծ իրականացնել օկուպացված ուկրաինական տարածքներում

ՌԴ ԱԳ նախարար Սերգեյ Լավրովը հաստատել է, որ Կրեմլը մտադիր է Ամերիկյան կողմին հրավիրել՝ ներդրումներ իրականացնել Ուկրաինայի օկուպացված տարածքներում։ Այս մասին հայտնում են ռուսական լրատվամիջոցները։

Լավրովին հարցրել են՝ երբ Կրեմլի ղեկավար Վլադիմիր Պուտինը հրավիրել է ամերիկացի ներդրողներին Ռուսաստանի Դաշնությունում հազվագյուտ հողային մետաղներ արդյունահանելու, արդյո՞ք նա նկատի ուներ Ուկրաինայի գրավված տարածքները:

«Երբ նախագահը կամ Ռուսաստանի ղեկավարության մեկ այլ ներկայացուցիչ հրավիրում է օտարերկրյա ներդրողներին մասնակցելու Ռուսաստանի տարածքում իրականացվող նախագծերին, նա, իհարկե, նկատի ունի Ռուսաստանի Դաշնության ողջ տարածքը, որը լիովին համապատասխանում է իր սահմանադրությանը»,- պատասխանել է Լավրովը: