«ԱՄՆ-ն կմշակի «Golden Dome» պաշտպանության նոր համակարգը»․ Թրամփ

ԱՄՆ կառավարությունը նախատեսում է մշակել և տեղակայել հակահրթիռային պաշտպանության նոր համակարգ՝ Golden Dome (Ոսկե գմբեթ): Այս մասին նա հայտարարել է ԱՄՆ Քոնգրեսի Ներկայացուցիչների պալատի և Սենատի առջև ելույթի ժամանակ։

«Որպես Գերագույն գլխավոր հրամանատար՝ ես կենտրոնացած եմ ապագայի հզորագույն բանակի կառուցման վրա: Որպես առաջին քայլ՝ ես խնդրում եմ Քոնգրեսին ֆինանսավորել ամենաառաջադեմ հակահրթիռային պաշտպանության վահանը՝ Golden Dome համակարգը՝ պաշտպանելու մեր հայրենիքը»,- ասել է Թրամփը:

Նա նշել է, որ նման հակահրթիռային պաշտպանության համակարգ ստեղծելու ծրագրեր արդեն իսկ գործում էին ԱՄՆ նախագահ Ռոնալդ Ռեյգանի օրոք (1981-1989 թվականներին), սակայն այն ժամանակվա տեխնոլոգիան թույլ չի տվել իրականացնել նախագիծը։

«Սակայն այժմ մենք ունենք այդ տեխնոլոգիաները, դրանք ուղղակի անհավանական են»,- հավելել է Թրամփը։ «Իսրայելն ունի այն, այլ երկրներ՝ ևս, և Միացյալ Նահանգները նույնպես պետք է ունենան»,- նշել է նա։

«Սա չափազանց, չափազանց կարևոր է: Աշխարհը շատ վտանգավոր է: Մենք ցանկանում ենք պաշտպանված լինել, և մենք պատրաստվում ենք պաշտպանել մեր քաղաքացիներին առավել, քան երբևէ»,- եզրափակել է Թրամփը: