Չինաստանը դեմ է Ուկրաինայի հարցով ԱՄՆ-Ռուսաստան բանակցություններին

Եվրոպական հարցերով Չինաստանի հատուկ ներկայացուցիչ Լու Շայեն ասել է, որ Եվրոպան և Ուկրաինան պետք է մասնակցեն խաղաղ գործընթացին Ռուսաստանի և ԱՄՆ-ի հետ հավասար հիմունքներով։ Նրա խոսքերը մեջբերում է South China Morning Post-ը։

«Եթե նայեք, թե ինչպես է Թրամփի վարչակազմը բացահայտ գերիշխող քաղաքականություն վարում Եվրոպայի նկատմամբ՝ դաշնակիցների հետ նման կերպ վերաբերվելով, անկեղծ ասած՝ միանգամայն ապշեցուցիչ է»,- ասել է Լուն Չինաստանի Ժողովրդական Քաղաքական Խորհրդատվական համաժողովի քննարկման ժամանակ:

Դիվանագետն ընդգծել է, որ ԱՄՆ-ի և Ռուսաստանի միջև պատերազմը կարգավորելու բանակցությունները չեն կարող անտեսել այլ կողմերի, մասնավորապես եվրոպական պետությունների կարծիքները։

«Որոշումները պետք է քննարկվեն հավասար հիմունքներով և ոչ թե պարտադրվեն սահմանափակ թվով երկրների կողմից: Սա չպետք է որոշվի միայն ԱՄՆ-ի և Ռուսաստանի միջև, հատկապես հաշվի առնելով Եվրոպայի մտահոգությունները, որն զգում է, որ նման դիվանագիտական ​​մանևրները պարզապես մի կողմ են մղում իրեն»,- ասել է չինացի դիվանագետը։

Միևնույն ժամանակ, Լու Շայեն ողջունել է Վաշինգթոնի և Մոսկվայի միջև ռուս-ուկրաինական պատերազմի կարգավորմանն ուղղված քննարկումները, սակայն ընդգծել է, որ ցանկացած խաղաղ գործընթաց պետք է ներառի բոլոր շահագրգիռ կողմերի, այդ թվում՝ եվրոպական երկրների ճանաչումն ու մասնակցությունը։