Թրամփը չի վերսկսի ռազմական աջակցությունն Ուկրաինային ռեսուրսների վերաբերյալ գործարքի ստորագրումից հետո. NBC News

Թրամփը չի վերսկսի ռազմական աջակցությունն Ուկրաինային ռեսուրսների վերաբերյալ գործարքի ստորագրումից հետո, հայտնում է NBC-ն։ ԱՄՆ-ի նախագահը «անձնական զրույցում հասկացրել է իր օգնականներին», որ ցանկանում է տեսնել Վլադիմիր Զելենսկու վերաբերմունքը Ռուսաստանի հետ բանակցային գործընթացի նկատմամբ, ներառյալ՝ տարածքային զիջումների գնալու պատրաստակամությունը։ Այս մասին հայտնել են NBC-ի անանուն աղբյուրները, այդ թվում՝ Թրամփի վարչակազմի ներկայացուցիչը։ Այնուամենայնիվ, Թրամփը պնդելու է, որ «ռեսուրսային գործարքն» ստորագրվի:
Ուկրաինային ռազմական օգնությունը վերականգնելու համար Թրամփի կողմից Կիևին առաջադրած ևս մեկ պահանջն էր «Ուկրաինայում ընտրությունների անցկացմանն ուղղված որոշ քայլեր և, հնարավոր է՝ այդ երկրի ղեկավարի հրաժարականը», հայտնում է NBC-ն՝ վկայակոչելով իր աղբյուրները։
Ընդ որում, Ուկրաինայում ընտրությունների անցկացումն արգելված է այնքան ժամանակ, քանի դեռ երկրում չի չեղարկվել ռազմական դրությունը։ Ավելի վաղ հայտնի էր դարձել, որ Թրամփի վարչակազմի ներկայացուցիչները բանակցություններ են վարել մի շարք ուկրաինացի ընդդիմադիր քաղաքական գործիչների հետ, սակայն նրանք բոլորը դեմ են արտահայտվել մինչև ռազմական գործողությունների ավարտը ընտրությունների անցկացմանը։