«Հորդանանը, Իրաքը, Լիբանանը և Թուրքիան Սիրիայի հետ համատեղ կպայքարեն ԻՊ-ի դեմ»․ Սաֆադի

Հորդանանը, Իրաքը, Լիբանանը և Թուրքիան Սիրիայի հետ միասին պայմանավորվել են «Իսլամական պետության» դեմ գործողություն իրականացնելու շուրջ»,- ասել է Հորդանանի ԱԳ նախարար Այման աս-Սաֆադին՝ Ամմանում կայացած ասուլիսի ժամանակ:

Աս-Սաֆադին նշել է, որ հանդիպման նպատակը «Սիրիայում եղբայրներին աջակցելն է՝ հանուն կայունության և ահաբեկչության դեմ հաղթանակի»: Նրա խոսքով՝ մեկ պետության անկայունությունը հանգեցնում է ողջ տարածաշրջանի անկայունությանը։

«Մենք աջակցում ենք Սիրիային՝ վերականգնմանն ուղղված իր ջանքերում և դեմ ենք նրա անվտանգությունն ու կայունությունը ապակայունացնելու ցանկացած փորձի»,- ասել է Հորդանանի արտգործնախարարը։

«Մենք շարունակում ենք պայքարել ԴԱԻՇ-ի դեմ, և մեր հանդիպման ժամանակ մշակվել է ծրագիր, որը ներառում է ահաբեկչության դեմ պայքարի համատեղ օպերատիվ շտաբի ստեղծումը»,- հավելել է Թուրքիայի արտգործնախարար Հաքան Ֆիդանը։

Սիրիայի արտգործնախարար Ասադ Հասան ալ-Շիբանին հայտարարել է, որ հանրապետության նոր իշխանությունները պաշտպանում են բոլոր բնակիչներին և թույլ չեն տա խտրականություն կամ անցյալի ողբերգությունների կրկնություն։