«Ուկրաինան պետք է տարածքային զիջումների գնա՝ ցանկացած դեպքում»․ Ռուբիո

Ուկրաինան պետք է տարածքային զիջումների գնա՝ խաղաղության ցանկացած համաձայնագրի շրջանակներում։ Այս մասին հայտարարել է ԱՄՆ պետքարտուղար Մարկո Ռուբիոն՝ մեջբերում է The New York Times-ը:

«Կարծում եմ՝ երկու կողմերն էլ պետք է հասկանան, որ այս իրավիճակը ռազմական լուծում չունի։ Ռուսները չեն կարող գրավել ողջ Ուկրաինան, և պարզ է, որ Ուկրաինայի համար շատ դժվար կլինի ցանկացած ողջամիտ ժամանակահատվածում ստիպելու ռուսներին վերադառնալ 2014 թվականի դիրքերին»,- լրագրողներին ասել է պետքարտուղարը՝ Սաուդյան Արաբիա ժամանելուց առաջ։

Ռուբիոն նշել է, որ ապագա բանակցությունները կորոշեն, թե ինչ զիջումների է պատրաստ գնալ Ռուսաստանը։

«Մենք չգիտենք, թե իրականում որքանով են կողմերը հեռու իրարից»։

Նրա խոսքով՝ ամերիկյան պատվիրակությունը կքննարկի Ուկրաինային ռազմական օգնության վերականգնման հարցը, եթե Կիևն իսկապես ցույց տա, որ պատրաստ է խաղաղության։

«Ամերիկյան պատվիրակությունը ցանկանում է համոզվել, որ Կիևը պատրաստ է բարդ որոշումների, նմանապես Մոսկվան դժվար քայլեր պետք է ձեռնարկի այս հակամարտությանը վերջ տալու կամ գոնե ինչ-որ կերպ այն դադարեցնելու համար»,- հավելել է Ռուբիոն։