Ռուսական զորքերը գրոհում են Սումի շրջանը

Ռուսական զորքերը փորձում են ճեղքել Ուկրաինայի Սումիի շրջանի սահմանը։ Այս մասին մարտի 12-ին ազգային հեռուստամարաթոնի ժամանակ հայտարարել է Պետական ​​սահմանային ծառայության մամուլի քարտուղար, գնդապետ Անդրեյ Դեմչենկոն։
«Փորձելով դուրս մղել ուկրաինական պաշտպանական ուժերին Կուրսկի շրջանից՝ ռուսները տասնյակ նման գրոհային գործողություններ են իրականացնում ուկրաինացի զինվորների դիրքերի դեմ։ Նրանք փորձում են հատել մեր սահմանային գիծը, որպեսզի շրջապատեն Կուրսկի շրջանում տեղակայված մեր ուժերը կամ կտրեն լոգիստիկ ուղիները»,- ասել է Դեմչենկոն։

Նրա խոսքով՝ ներկայում ռուսները փորձում են սահմանը հատել մինչև հինգ զինծառայողից բաղկացած փոքր գրոհային խմբերով։

Դեմչենկոն պնդում է, որ միայն անցած 24 ժամվա ընթացքում մոտ 20 ռուս է սպանվել, ևս 15-ը վիրավորվել և նահանջել են Ռուսաստանի տարածք։