«ՆԱՏՕ-ն լրացուցիչ սպառնալիքներ է ստեղծում Արկտիկայում ՌԴ-ի անվտանգության համար». ՌԴ ԱԳՆ

Քանի որ Հյուսիսատլանտյան դաշինքն ընդլայնվում է, այն լրացուցիչ սպառնալիքներ է ստեղծում Արկտիկայում Ռուսաստանի անվտանգության համար, տարածաշրջանում ռազմական և քաղաքական լարվածությունն աճում է: Այս մասին հայտարարել է ՌԴ ԱԳՆ եվրոպական հիմնախնդիրների դեպարտամենտի տնօրեն Վլադիսլավ Մասլեննիկովը։

«Ներկայիս աշխարհաքաղաքական պայմաններում, արևմտյան երկրների դրդմամբ, Արկտիկայում բացասական միտումները, ցավոք, աճում են: Ֆինլանդիայի և Շվեդիայի մուտքը Հյուսիսատլանտյան դաշինք և, այդպիսով, տարածաշրջանում ՆԱՏՕ-ի ներկայության աճն առաջացրել է ռազմական և քաղաքական լարվածության աճ»,- ասել է դիվանագետը:

Նրա խոսքով՝ ՆԱՏՕ-ի գործողությունները տարածաշրջանում «լրացուցիչ մարտահրավերներ և սպառնալիքներ են ստեղծում Ռուսաստանի անվտանգության և նրա ազգային շահերի համար: Հայտնի է, որ կիրառվում են ոչ լեգիտիմ պատժամիջոցներ, որոնք կոչված են խոչընդոտելու Ռուսաստանի արկտիկական գոտու զարգացումը և, ընդհանուր առմամաբ, ողջ հյուսիսում միջազգային համագործակցությունը», - նշել է դիվանագետը։

«Հյուսիսատլանտյան դաշինքը նաև մտադիր է մոտ ապագայում ակտիվացնել ռազմական ուսումնական գործունեությունը Ռուսաստանի հյուսիսային սահմանների մոտ», հավելել է Մասլեննիկովը։