Թրամփը չի բացառում Գրենլանդիան ռազմական ճանապարհով ԱՄՆ-ին կցելու տարբերակը. WSJ

578

Հինգշաբթի, 13 մարտի, 2025 թ., 18:43

ԱՄՆ-ի նախագահ Դոնալդ Թրամփի մտադրությունները Միացյալ Նահանգների ընդլայնման վերաբերյալ լուրջ են, Սպիտակ տան ղեկավարը չի բացառում Գրենլանդին ռազմական ճանապարհով բռնակցելու տարբերակը: Այս մասին հաղորդել է Wall Street Journal-ը՝ աղբյուրներին հղումով:

Ամերիկյան վարչակազմի ներկայացուցիչները հայտարարել են, որ պատրաստ են լսել Դանիայի առաջարկները՝ կղզում ամերիկյան զորախմբի աճի, ինչպես նաև Միացյալ Նահանգների հանքարդյունաբերական ընկերությունների հետ պայմանագրերի կնքման մասին: Այնուամենայնիվ, Թրամփը «լուրջ է տրամադրված Գրենլանդիային տիրապետելու իր ցանկության մեջ և հրաժարվում է բացառել դրա ձեռքբերման ռազմական ուղիները»:

Զրուցակիցներից մեկը նշել է, որ Սպիտակ տունը քննարկում է, թե ինչպես կարող է Վաշինգթոնն ստանալ Գրենլանդիան:

Պանամայի քաղաքական իրավիճակին ծանոթ աղբյուրն էլ հայտնել է, որ երկրի իշխանություններն ամեն գնով փորձում են մեղմել ամերիկացի առաջնորդին՝ միաժամանակ պահպանելով ինքնիշխանությունը Պանամայի ջրանցքի վրա: Ըստ նրա, Սպիտակ տունը գոհ է այն զիջումներից, որոնց Պանամայի գործընկերներն արդեն գնացել են, բայց Թրամփը դեռ ցանկանում է «վերադարձնել ջրանցքը Միացյալ Նահանգներ»: