«Տավուշում բազում քանդվող վանքերից ու պատմական կոթողներից նորոգվելու է ընդամենը երկուսը»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Տավուշում բազում վանքեր, պատմական կոթողներ քանդվում են, 2025-ին նորոգվելու են դրանցից երկուսը։
Տավուշի մարզում բազում հնամենի վանքեր, պատմական հուշարձաններ՝ Կիրանցի, Առաքելոց, Դեղձնուտի վանքերը, Մշկավանքը և այլք, վատթար վիճակում են, քանդվում, քայքայվում են։ Տավուշի մարզպետ Հայկ Ղալումյանին հարցրել եմ․ «Տավուշի մարզում 2025 թվականին պետական բյուջեի ֆինանսավորմամբ քանի՞ հնամենի, պատմական հուշարձան է նորոգվելու, որո՞նք են այդ հուշարձանները, ինչքա՞ն է տրվելիք գումարի չափը, ե՞րբ են ավարտվելու այդ աշխատանքները»։
«2025 թվականին նորոգվելու են Սրվեղի վանական համալիրը և Տավուշի Բերդ ամրոցը: Վերանորոգման գումարի չափը ճշտելու համար առաջարկում ենք դիմել ՀՀ կրթության, գիտության, մշակույթի և սպորտի նախարարություն»:
Լուսանկարում՝ Իջևանի Այգեհովիտ գյուղի տարածքում գտնվող Սրվեղի վանքը»։