«Եթե բյուջեում գումար չկար, Ավինյանն ինչո՞ւ է խոստացել ապահովել բնակարաններով»․ լրագրողը՝ քաղաքապետարանի աշխատակցին

«Ոչ մի տեղ էլ չենք գնում, հո լակոտ չենք, թող իջնեն հստակ պատասխան տան»,- ասում է քաղաքապետարանի դիմաց բողոքի ակցիա իրականացնող Վարդաշենի 68ա 4-րդ կարգի վթարային շենքի բնակչուհին։ Նրանք պահանջում են, որպեսզի քաղաքապետ Տիգրան Ավինյանը պատասխանի, թե ինչո՞ւ է 1,5 տարի առաջ խաբել՝ նախընտրական քարոզարշավին խոստանալով բնակարաններով ապահովել։ Բնակիչների մոտ իջավ քաղաքապետարանի գույքի կառավարման վարչության պետի տեղակալ Կարեն Մարգարյանը, ով հայտնեց, որ հարցի լուծումը կապված է շատ մեծ գումարների հետ, իսկ քաղաքապետարանի բյուջեն թույլ չի տալիս այդ ծախսերն իրականացնել և խնդիրը պետք է լուծվի Կառավարության կողմից․ «Ֆինանսական աջակցությունը պետք է կառավարությունից ստանանք, քաղաքապետարանն այդքան գումար չունի։ Մենք նաև բնակարանային ֆոնդ չունենք։ Խոսքը մոտ 3 միլիարդ դրամի մասին է»,- հայտնեց Կարեն Մարգարյանը։ Լրագրողի դիտարկմանը, իսկ եթե քաղաքապետարանը բյուջեում այդքան գումար չկար, ինչո՞ւ է Ավինյանը խոստացել 1,5 տարվա ընթացքում լուծել խնդիրը, քաղաքապետարանի աշխատակիցը պատասխանեց․ «Ինչ գիտեի՝ փոխանցեցի, այլ տեղեկություն չունեմ»։
Բնակիչներին բարկացրեց աշխատակցի ոչ հստակ պատասխանը, նրանք շարունակում են իրենց ակցիան՝ պահանջելով ավելի կոնկրետ պատասխան։