«Իսրայելն առավելագույն ճնշում կգործադրի ՀԱՄԱՍ-ի վրա»․ Նեթանյահուի գրասենյակ

Իսրայելն առավելագույն ճնշում կգործադրի ՀԱՄԱՍ-ի վրա՝ բոլոր հնարավոր միջոցներով։ Այս մասին ՏԱՍՍ-ին հայտնել է Իսրայելի վարչապետի աշխատակազմի խորհրդական Դմիտրի Գենդելմանը՝ մեկնաբանելով The Wall Street Journal-ի հրապարակումը, թե Իսրայելի իշխանությունները ծրագրում են ցամաքային լայնածավալ գործողություն իրականացնել Գազայի հատվածում։

«Իսրայելը կձեռնարկի հնարավոր բոլոր միջոցները պատանդներին ազատելու համար և առավելագույն ճնշում կգործադրի ՀԱՄԱՍ-ի վրա, որպեսզի բոլոր առևանգվածները հնարավորինս շուտ տուն վերադառնան»,- ասել է Գենդելմանը։

Ըստ աղբյուրի՝ հրեական պետության ղեկավարությունը կարծում է, որ պաղեստինյան անկլավի զգալի մասի վերահսկումը թույլ կտա վերջնական հաղթանակի հասնել ​​ՀԱՄԱՍ շարժման նկատմամբ։

Մարտի 18-ին իսրայելական բանակը վերսկսել էր ռազմական գործողությունները Գազայում՝ օդային հարվածներ հասցնելով անկլավին։ Նեթանյահուի գրասենյակը դա բացատրել էր նրանով, որ ՀԱՄԱՍ-ը հրաժարվել է միջնորդների և ԱՄՆ նախագահի հատուկ բանագնաց Սթիվ Ուիթքոֆի առաջարկներից՝ նշելով, որ Գազայի հատվածում գործողության նպատակը բոլոր պատանդներին ազատելն է։