Ֆիդանն ու Ռուբիոն քննարկել են տարածաշրջանային, այդ թվում՝ հայ-ադրբեջանական կարգավորմանն առնչվող հարցեր

Թուրքիայի ԱԳ նախարար Հաքան Ֆիդանը և ԱՄՆ պետքարտուղար Մարկո Ռուբիոն Վաշինգթոնում տեղի ունեցած հանդիպման ժամանակ քննարկել են տարածաշրջանային հարցեր, այդ թվում՝ Ադրբեջանի և Հայաստանի միջև խաղաղ գործընթացը, հայտնում է Թուրքիայի ԱԳՆ-ն։
«Հանդիպման ընթացքում կողմերն ընդգծել են Սիրիայի կառավարության հետ համագործակցելու կարևորությունը, վերահաստատել Սիրիայի կայունությունն ապահովելու և ահաբեկչության դեմ պայքարելու հարցում իրենց վճռականությունը»- նշված է տեքստում:
Ֆիդանը և Ռուբիոն քննարկել են նաև երկկողմ հարաբերություններին առնչվող և տարածաշրջանային այլ հարցեր, այդ թվում՝ Գազայում մշտական զինադադարի անհրաժեշտությունը՝ որպես տարածաշրջանում խաղաղության կարևոր պայման, ինչպես նաև երկու երկրների նախագահների այցերի նախապատրաստումն ու պաշտպանության ոլորտում համագործակցության խոչընդոտները վերացնելու հանձնառությունը: Կողմերը պատրաստակամություն են հայտնել լուծել խնդիրները՝ տեխնիկական բնույթի հանդիպումների միջոցով:
Քննարկվել են նաև Ռուսաստանի և Ուկրաինայի միջև զինադադարին ուղղված ջանքերը, Թուրքիայի աջակցությունն ԱՄՆ-ի նախաձեռնություններին, Բոսնիայի և Հերցոգովինայի կայունությունը, ինչպես նաև Ադրբեջանի և Հայաստանի միջև ներկայում ընթացող խաղաղության գործընթացը: