«Դեռ վաղ է դիտարկել ՌԴ-ի դեմ պատժամիջոցները չեղարկելու հարցը»․ Մակրոն

Ֆրանսիայի նախագահ Էմանուել Մակրոնը, BBC-ի փոխանցմամբ, հայտարարել է, որ դեռ վաղ է դիտարկել Ռուսաստանի դեմ պատժամիջոցները չեղարկելու հարցը, որոնք սահմանվել էին Ուկրաինայի վրա լայնամասշտաբ հարձակումից հետո։

«Մենք չենք պատրաստվում չեղարկել պատժամիջոցները, դեռևս շատ վաղ է խոսել այդ մասին: Վերջին հաշվով, պատժամիջոցները բացառապես կախված են միջազգային իրավունքին հետևելու՝ Ռուսաստանի ընտրությունից»,- ասել է Մակրոնը՝ Փարիզում Ուկրաինայի նախագահ Վլադիմիր Զելենսկու հետ բանակցություններից հետո:

Մակրոնը մեղադրել է Ռուսաստանին նորանոր պայմաններ առաջադրելու և հրադադարի առաջարկներին չարձագանքելու մեջ։

«Ուկրաինան ԱՄՆ-ին հստակորեն հայտնել է իր համաձայնությունը 30-օրյա ամբողջական և անվերապահ հրադադարի հարցում՝ չնայած այն հանգամանքին, որ նա ագրեսիայի զոհ է դարձել»,- նշել է Ֆրանսիայի նախագահը։ «Մենք ակնկալում ենք նույն պարտավորությունը Ռուսաստանից», հավելել է նա։

Մակրոնը նաև հայտարարել է, որ Ֆրանսիան Ուկրաինային կտրամադրի մոտ 2 միլիարդ եվրոյի լրացուցիչ ռազմական օգնություն:

Վլադիմիր Զելենսկին, իր հերթին, հայտնել է, որ լուրջ որոշումներ է ակնկալում հինգշաբթի Փարիզում Ուկրաինային աջակցող կոալիցիայի գագաթնաժողովից, որին, բացի Մակրոնից, կմասնակցեն նաև Գերմանիայի կանցլեր Օլաֆ Շոլցը և Մեծ Բրիտանիայի վարչապետ Քիր Սթարմերը։

«Այժմ, իհարկե, ժամանակը չէ մեղմելու Ռուսաստանի վրա ճնշումը կամ թուլացնելու մեր միասնությունը հանուն խաղաղության»,- ասել է Զելենսկին։