«ՌԴ-ն ձգտում է ՀՀ-ի հետ համապարփակ հարաբերությունների»․ Զախարովա

Մեկնաբանելով ՌԴ -ի հետ հարաբերությունները բարելավելու՝ Հայաստանում շրջանառվող լուրերը,

մասնավորապես ԱԺ նախագահ Ալեն Սիմոնյանի հայտարարությունը, թե «անընդհատ չենք կարող լարվածության մասին խոսել ու լարվածություն պահել ՌԴ -ի հետ հարաբերություններում», ՌԴ ԱԳՆ պաշտոնական ներկայացուցիչ Մարիա Զախարովան մատնանշել է հարաբերությունների բարելավմանն ուղղված՝ երկու երկրների միջև իրականացվող գործնական աշխատանքը տարբեր ոլորտներում։

«Որպես հարևան երկրներ մենք միշտ հրաշալի հարաբերություններ ենք ունեցել ՀՀ-ի հետ, մեր շփումներն արհեստական չեն, այլ բնական, աշխարհագրական գործոններով պայմանավորված։ ՀՀ-ի նկատմամաբ մեր դիրքորոշումը հստակ է՝ ՌԴ-ն ձգտում է Հայաստանի ու նրա ժողովրդի հետ համապարփակ հարաբերությունների», նշել է Զախարովան։

Ինչ վերաբերում է Ալեն Սիմոնյանի հայտարարությանը, թե

չի կարծում, որ «կվերանայվի ՀԱՊԿ-ի հետ կապված իրավիճակը, ՀԱՊԿ-ը պետք է վերանայի իրեն», Զախարովան նշել է այս հարցում ՀՀ իշխանությունների պաշտոնական դիրքորոշման բացակայությունը, միաժամանակ շեշտելով, որ ինչպես ՀԱՊԿ-ի հարցում, այնպես էլ ԵԱՏՄ-ԵՄ ընտրության հարցում ՀՀ-ն պետք է հայտնի իր պաշտոնական դիքորշումը։

«ԵԱՏՄ-ին և ԵՄ-ին անդամակցումը փոխբացառող, իրարամերժ բաներ են՝ զուտ կոնկրետ պարամետրերով՝ առանց գաղափարական կամ քաղաքական ենթատեքստի», նշել է ՌԴ ԱԳՆ ներկայացուցիչը։