Փարիզում մեկնարկել է Ուկրաինայի անվտանգությանը նվիրված ԵՄ գագաթնաժողովը

Ֆրանսիայի նախագահ Էմանուել Մակրոնը Փարիզում հյուրընկալում է եվրոպական ղեկավարներին, այդ թվում՝ Ուկրաինայի նախագահ Վլադիմիր Զելենսկուն, հաղորդում է France24 պարբերականը

Գագաթնաժողովում կքննարկվի Ուկրաինայի անվտանգությունն ամրապնդելու հարցը՝ Ռուսաստանի հետ հնարավոր հրադադարից առաջ։

Գագաթնաժողովից առաջ Էմանուել Մակրոնը հեռախոսազրույց է ունեցել ԱՄՆ նախագահ Դոնալդ Թրամփի հետ։ Հանդիպումից առաջ X սոցիալական հարթակում ԵԽ ղեկավար Անտոնիու Կոշտան հայտարարել է, որ Ուկրաինային «արդար և տևական խաղաղության» հասնելու հարցում օգնելու լավագույն միջոցը Ռուսաստանի դեմ պատժամիջոցների պահպանումն է՝ նշելով, որ մարտի 27-ին ինքն այդ ուղերձը կփոխանցի ԵՄ ղեկավարներին։

Սա, այսպես կոչված, «կամեցողների կոալիցիայի» երրորդ գագաթնաժողովն է՝ Ֆրանսիայի նախագահ Էմանուել Մակրոնի և Մեծ Բրիտանիայի վարչապետ Քիր Սթարմերի նախաձեռնությամբ, որի նպատակն է քննարկել Ուկրաինային ռազմական աջակցության տրամադրումը, ինչպես նաև այն դերը, որ Կիևի դաշնակիցներն ապագայում պետք է ունենան՝ հրադադարի դեպքում Ուկրաինային անվտանգության երաշխիքների տրամադրման գործում։

Ուկրաինայի նախագահ Վլադիմիր Զելենսկին, Telegram-ի իր ալիքում մեկնաբանելով գագաթնաժողովի մեկնարկը, նշել է. «Եվրոպան գիտի՝ ինչպես պաշտպանվել, մենք պետք է դա ապացուցենք»։