Իսրայելը նախազգուշացրել է Բեյրութում սպասվող ավիահարվածի մասին

Իսրայելի պաշտպանության բանակը նախազգուշացրել է Բեյրութում գտնվող «Հըզբոլլահի» թիրախին ուղղված սպասվող ավիահարվածի մասին և տեղի բնակիչներին կոչ է արել լքել տարածքը: Այս մասին X սոցիալական հարթակում հաղորդագրություն է տարածել Իսրայելի պաշտպանության բանակի ներկայացուցիչ Ավիչայ Ադրայը:

«Զգուշացում բոլորին, ովքեր գտնվում են կարմիրով նշված շենքում կամ դրա շուրջ գտնվող շենքերում։ Դուք գտնվում եք «Հըզբոլլահին» պատկանող օբյեկտների մոտ», - գրել է խոսնակը՝ գրառմանը կցելով լուսանկար:
Նա բնակիչներին կոչ է արել անհապաղ տարհանվել և առնվազն 300 մետր հեռանալ այն թիրախից, որին կհարվածեն իսրայելական ուժերը։

The Times of Israel-ը հիշեցնում է, որ սա առաջին նման նախազգուշացումն է 2024 թվականի նոյեմբերին Իսրայելի և Լիբանանի միջև հրադադարի համաձայնագրի ստորագրումից ի վեր: Իսրայելի պաշտպանության բանակը վերջին անգամ հարվածներ էր հասցրել Բեյրութում գտնվող թիրախներին 2024 թվականի նոյեմբերի 27-ին՝ հրադադարի ուժի մեջ մտնելուց ժամեր առաջ: