«Կարծում եմ` Իրանը պատրաստ է ուղիղ բանակցությունների»․ Թրամփ

ԱՄՆ նախագահ Դոնալդ Թրամփը հայտարարել է, որ Իրանը կարող է համաձայնել ուղիղ բանակցություններին՝ չնայած երկու երկրների միջև գոյություն ունեցող լարվածությանը և սպառնալիքներին: Լրագրողների հետ զրույցում ԱՄՆ նախագահը լավատեսորեն էր տրամադրված Թեհրանի հետ ուղղակի դիվանագիտական կապեր ունենալու հեռանկարի հարցում:

«Կարծում եմ, ավելի լավ է, որ մենք ուղիղ բանակցություններ ունենանք»,- ասել է Թրամփը:

«Դա ավելի արդյունավետ է, շատ ավելի լավ ենք հասկանում մյուս կողմին՝ քան միջնորդների միջոցով: Չնայած նրանք (Իրանը) կողմ են միջնորդներին, ես չեմ կարծում, որ դրա կարիքը կա»,- հավելել է ԱՄՆ նախագահը:

Անցյալ ամիս Թրամփը նամակ էր հղել Իրանի ղեկավարությանը՝ կոչ անելով բանակցություններ վարել միջուկային ծրագրի վերաբերյալ: ԱՄՆ նախագահը նաև պարբերաբար Իրանին սպառնում է ռազմական հարվածներով:

Թեհրանը մերժել էր Վաշինգթոնի հետ ուղիղ բանակցությունների հեռանկարը՝ հայտարարելով, որ բաց է անուղղակի բանակցությունների համար: