Թրամփի վարչակազմը գերատեսչություններին ուղարկում է Գրենլանդիան բռնակցելու վերաբերյալ կարգադրություններ

Դոնալդ Թրամփի վարչակազմը հրահանգներ է ուղարկել երկրի գերատեսչություններին այն մաիսն, թե ինչպես կյանքի կոչել Գրենլանդիան Ամերիկայի Միացյալ Նահանգներին (ԱՄՆ) միացնելու ծրագիրը։ Այս մասին հայտնում է The New York Times-ը՝ հղում անելով աղբյուրներին։

Նշվում է, որ ըստ պլանի, նախատեսված է մեդիա արշավ իրականացնել՝ Դանիային պատկանող ինքնավար մարզի բնակչությանն ԱՄՆ-ին միանալ համոզելու համար: Մասնավորապես, գրում է թերթը, Թրամփի վարչակազմը մտադիր է կղզու բնակչության շրջանում առաջ մղել Գրենլանդիայի բնիկ բնակչության՝ ինուիտների (էսկիմոսների) և Ալյասկայի բնիկ բնակիչների ընդհանուր ժառանգության մասին թեզը։ ԱՄՆ-ի իշխանությունները դիտարկում են նաև կղզուն ֆինանսական օգնություն տրամադրելու տարբերակը, որը կփոխարինի Դանիայից ստացվող՝ տարեկան 600 միլիոն դոլարի չափով վճարումներին։
Միացյալ Նահանգների նախագահ Դոնալդ Թրամփը բազմիցս հայտարարել է Գրենլանդիան միացնելու իր մտադրության մասին։

Իր հերթին կղզու նոր վարչապետ Յենս-Ֆրեդերիկ Նիլսենը կտրականապես մերժել է կղզու՝ ԱՄՆ-ին միանալու հնարավորությունը։ Նա ընդգծել է, որ Գրենլանդիան ինքն է «որոշում իր ապագան»։