Թրամփը չեղարկել է էլեկտրոնային սարքերի ներմուծման «հայելային» մաքսատուրքերը

ԱՄՆ նախագահ Դոնալդ Թրամփի վարչակազմը էլեկտրոնային մի շարք սարքերի, այդ թվում՝ սմարթֆոնների և համակարգիչների, ներմուծման «հայելային» մաքսատուրքերից ազատելու մասին որոշում է կայացրել։
Այս մասին հայտնում է Bloomberg-ը՝ հղում անելով ԱՄՆ մաքսային և սահմանային պաշտպանության ծառայությանը։

Ըստ աղբյուրի՝ տուրքերից ազատված ապրանքների ցանկում ներառված են սմարթֆոններ, նոութբուքեր, կոշտ սկավառակներ, համակարգչային տեխնիկա և հիշողության չիպեր, ինչպես նաև կիսահաղորդիչների արտադրության համար սարքավորումներ։

Թրամփն ապրիլի 2-ին հրաման էր ստորագրել այլ երկրներից ներմուծվող ապրանքների համար «հայելային» մաքսատուրքեր սահմանելու մասին։ Ապրիլի 9-ին նա հայտարարել էր, որ ավելի քան 75 երկրներ բանակցություններ են խնդրել մաքսատուրքերը չեղարկելու համար, ուստի 90 օրով ներմուծման հիմնական մաքսատուրքերը (10%-ով) կգործեն բոլորի համար՝ բացի Չինաստանից: