«Ուիթքոֆի և Արաղչիի անմիջական շփումն առաջընթաց քայլ էր»․ Սպիտակ տուն

Օմանում ԱՄՆ նախագահի հատուկ բանագնաց Սթիվ Ուիթքոֆի և Իրանի արտգործնախարար Աբբաս Արաղչիի անմիջական շփումն առաջընթաց քայլ էր՝ ուղղված փոխշահավետ արդյունքի: Այս մասին ասվում է Սպիտակ տան հայտարարության մեջ։

«Հատուկ բանագնաց Ուիթքոֆն Արաղչիի հետ զրույցում ընդգծել է, որ հրահանգներ է ստացել Թրամփից՝ հնարավորության դեպքում լուծել երկու երկրների միջև առկա տարաձայնությունները՝ երկխոսության և դիվանագիտության միջոցով:

Այս հարցերը շատ բարդ են, և Ուիթքոֆի այսօրվա անմիջական շփումը փոխշահավետ արդյունքի հասնելու համար առաջընթաց քայլ էր»,- ասվում է փաստաթղթում։

Ավելի վաղ Ուիթքոֆն ու Արաղչին անուղղակի բանակցություններ են վարել Օմանի մայրաքաղաք Մասկատում։

Բանակցություններից հետո, Իրանի ԱԳՆ-ի փոխանցմամբ, Իրանի ԱԳ նախարարն ու ԱՄՆ նախագահի հատուկ բանագնացը մի քանի րոպե երկխոսություն են ունեցել՝ Օմանի արտգործնախարարի ներկայությամբ։