«Եթե աղքատ ես, չես կարող օգտվել արդարադատությունից». Լիաննա Խաչատրյան

Օգտատեր Լիաննա Խաչատրյանը ֆեյսբուքյան իր էջում գրել է. «Ընտանեկան բռնության մասին հարցազրույց էի կարդում։ Մեծ հաշվով ոչ մի նոր բան, բացի թերևս կնոջ անունով վարկեր վերցնել ու թողնել նրա ուսերին էտ բեռը, ձեռքի հետ էլ, դե, ծեծելը։
ԲԱՅՑ աչքս ծակեց այն պահը, որ ցանկացած դատական հայցի համար պետական տուրք է պահանջվում մոտ 20000 դրամ, իսկ կանայք կան, որ բազմաթիվ հայցերով են դիմում։ Դրան էլ գումարած իրավաբանական ծառայությունների գումարը։ Այս կետը հարվածում է ոչ միայն բռնության ենթարկված կանանց, այլ օրինակ շահագործված աղքատ տղամարդկանց։ Հիշենք, օրինակ, ներքին թրաֆիկինգի կամ խարդախության զոհերին։
Ստացվում է, որ եթե ինչ-ինչ պատճառներով աղքատ ես, դու չե՞ս կարող օգտվել արդարադատությունից: Պիտի մնաս առանձին ՀԿ-ների բարեգործության հույսին։ Պետությունն, ի վերջո, պարտավոր է ապահովել դատարանի հասանելիությունը բոլորին՝ անկախ եկամտից։ Թե չէ այսպես ստացվում է, որ արդարադատությունը ոչ թե իրավունք է, այլ արտոնություն։ Հը՞»: