«Իրանը մեր քթից բռնած ման է տալիս». Թրամփ

ԱՄՆ-ի նախագահ Դոնալդ Թրամփը ենթադրում է, որ Իրանը ձգձգում է միջուկային զենքի մասին նոր համաձայնագրի կնքումը և սպառնացել է պատասխան քայլեր ձեռնարկել:

Այս մասին նա լրագրողներին ասել է ապրիլի 14-ին Սպիտակ տանը, գրում է CNN-ը։

Թրամփն ասել է, թե Իրանը «մեր քթից բռնած ման է տալիս», քանի որ Իրանի միջուկային ծրագրի շուրջ հաջորդ բանակցությունները նախատեսված են շաբաթ օրը, իսկ դա «շատ ուշ է»:

ԱՄՆ-ի նախագահն ասել է, որ Իրանը «պետք է ազատվի միջուկային զենքի գաղափարից»: Ըստ նրա, Իրանը «բավականաչափ մոտ է» միջուկային զենք ունենալուն, և բանակցությունները պետք է արագ ընթանան: «Եվ եթե մենք պետք է շատ կոշտ բան անենք, մենք դա կանենք»,- խոստացել է Թրամփը։

Հարցին, թե արդյոք ԱՄՆ-ի պատասխան տարբերակները ներառում են ռազմական հարված Թեհրանի միջուկային օբյեկտներին, Թրամփը պատասխանել է. «Իհարկե, այո»:

Իրանի միջուկային ծրագրի շուրջ ապրիլի 12-ին Օմանում կայացած առաջին հանդիպումը ղեկավարել են Թրամփի՝ Մերձավոր Արևելքի բանագնաց Սթիվ Ուիթքոֆը և Իրանի արտգործնախարար Աբբաս Արաղչին։

Երկու կողմերն էլ Օմանի մայրաքաղաքում կայացած առաջին հանդիպումը կառուցողական են որակել։ Անուղղակի բանակցությունները նախատեսվում է շարունակել այս շաբաթվա վերջին Իտալիայում։

Թրամփը նախկինում ասել էր, որ Իրանը կենթարկվի աննախադեպ ռմբակոծության, եթե համաձայնության չգա Միացյալ Նահանգների հետ: