«ԱՄՆ-ն առաջ է շարժվում ՌԴ-ի հետ Ուկրաինայի հարցով բանակցություններում»․ Ուիթքոֆ

ԱՄՆ-ն ակտիվորեն բանակցում է Ռուսաստանի հետ՝ Ուկրաինայի հարցում համաձայնության հասնելու համար։ Այս մասին Fox News-ի եթերում հայտարարել է ԱՄՆ նախագահի հատուկ բանագնաց Սթիվ Ուիթքոֆը՝ ի պատասխան հարցին, թե վստա՞հ է արդյոք, որ Ռուսաստանի հետ Ուկրաինայի հարցում պայմանավորվածություն ձեռք կբերվի։
«Այո, վստահ եմ»,- պատասխանել է Թրամփի հատուկ ներկայացուցիչը։

Ուիթքոֆը հավելել է, որ արդեն երեք անգամ հանդիպել է ՌԴ նախագահ Վլադիմիր Պուտինի հետ, իսկ վերջին անգամ բանակցությունները տևել են մոտ հինգ ժամ։ Հանդիպմանը մասնակցել են նաև ՌԴ նախագահի երկու խորհրդականները՝ ՌԴ նախագահի արտաքին քաղաքականության գծով օգնական Յուրի Ուշակովը և Ռուսաստանի ուղղակի ներդրումների հիմնադրամի ղեկավար, օտարերկրյա երկրների հետ ներդրումների և տնտեսական համագործակցության հարցերով ՌԴ նախագահի հատուկ ներկայացուցիչ Կիրիլ Դմիտրիևը։ Ուիթքոֆի խոսքով՝ դա կարևոր հանդիպում էր։

«Խաղաղության համաձայնագիրը վերաբերում է, այսպես կոչված, հինգ տարածքներին, բայց այն հարցերի շատ ավելի լայն շրջանակ է ներառում՝ անվտանգության հարցեր, ՆԱՏՕ-ի 5-րդ հոդված և այլն: Սա բարդ իրավիճակ է՝ արմատավորված երկու երկրների միջև տեղի ունեցող իրական խնդրահարույց իրադարձություններով»,- ասել է ԱՄՆ բարձրաստիճան պաշտոնյան։

Հիշեցնենք՝ ԱՄՆ նախագահի հատուկ բանագնաց Սթիվ Ուիթքոֆը Սանկտ Պետերբուրգ էր ժամանել ապրիլի 11-ին։ Նույն օրը նա հանդիպում էր ունեցել Կիրիլ Դմիտրիևի, իսկ ավելի ուշ՝ Պուտինի հետ։